Çalakîyê grevê vêşanîye yê seba wedartişê tecrîdê Îmraliyî ke bi serkêşîya hemsereka KCD’yî û parlamentera HDP’yî ya Colemêrgî Leyla Guvene dest pêkerdibi dewam kenê.  Parlamentera HDP’yî ya Sêrtî Meral Daniş Beştaş a ke xoverdayîşê grevê vêşanîye ercnayî vat hukmat bi hêrişan wazeno ke çalakîya xoverdayoxanê grevê vêşanîye bişikno.

Beştaşe ard vîrî ke çalakîya Guvene kewta roja xo ya 130’ine û vat, “Dewlete vat qey eke Leyla Guvene serbest veradîyo do fek çalakîya xo ra vera bido. Leyla Guvene tim vatêne ke ez seba xo çîyêk nêwazena, waştişê min o tekane wedarîyayîşê tecrîdî yo. Îqtîdarî reyna planê ewiqnayîşî fîna dewre.

Sere de Mehmet Ocalan şirawit Îmrali, dima ra zî Leyla Guvene serbest vera daye. AKP’y’i bi nê planî waştêne ke grevê vêşanîye biqedîyê û serê waştişê xoverdayoxan bêro girewtene. Îqtîdar nê xusûsî de bi ser nêkewt. Seba ke îqtîdar çalakwanan ra tersayêne seba 5 xoverdayoxan bi hezaran polîsan eşt banê HDP’yî yê bajarê Amedî ser. Dewlete kena ke bi ablûka û zextan bi şarî çok bido ronayene. Labelê şar îradeyê xo rê wayîr vejîya û dorê partîya xo de bi yew.”

ROJDEMÊ HER KESÎ TECRÎD O

Beştaşe vat ke herinda ke hukmat hêriş bikero ganî cewab bido waştişanê çalakwanan û vat, “Herinda ke wezîrê Karanê Zereyî Suleyman Soylu gefan waneno wa gureyê xo bîyaro ca. Herinda ke hêriş kenê ganî cewab bidê waştişê xoverdayoxan û tecrîdê serê Ocalanî tavilî bêro wedaritene. Waştişê xoverdayoxan bicaardişê huqûqî yo û wedaritişê tecrîdî yo.   Ma qesawet kenê ke zîndanan ra xeberêka xirabe bêro. Mesuldarê nê zî dewlet a. Dewlete mecbûr a ke hemwelatijanê xo bido ciwîyayene û seba nê çi dest ra yeno ganî bikero.”

Beştaşe ard ziwan ke rojdemo yewin ê her kesî tecrîd o û qiseykerdişê xo wina domna, “Wextêko dergo ke xebatê weçînitişî dest pêkerdê. Ma her ca de goş da waştişanê şarî. Her keye de, cade de, mehla de rojdemo yewin ê şarî tecrîd û xoverdayoxê grevê vêşanîye yê. Bala her kesî zîndanan û xoverdayoxan ser o ya. Xeylî hemwelatijî û mayî vanê gama ke ma wer wenê, awe şimenê, cayî de rakewenê seke ma sûcêk kerdo hîs kenê. Şarê ma ferqê her çîyî de yo û hemverê nê de zaf mutewazî yo.”

TARÎX DO RAMOJNO KAM DO ŞIRO, KAM DO BIMANO

Beştaşe bale ante zextanê HDP’yî ser û qiseykerdişê xo bi nê vatişanê qedêna:   “Ma çend rojî verî buroyê xo yê weçînitişî akerd. Bi saetan serê ma de dronî geyrayî û polîsan dorê ma girewt. Dewlete wazena ke bi zext û hêrişan şarî bitersno û bi ci çok bido ronayene. Wa dewlete bîlasebeb cehd nêkerdo ne ma, ne zî şarê ma terseno. Ma bi hêriş, destbendkerdiş û tepiştişan game peyde nêerzenê.

Qedîyayîşê tecrîdî waştişê bi mîlyonan merdiman o. Ez bawer kena ke waştişê cimatê Tirkîya zî no yo. Maya tu polîs û leşkerî nêwazena ke welat de şer bibo. Edîrne ra heta Tekîrdag ûca ra heta Colemêrg tu maye nêwazena ke domanê xo ra xeberêka nebaşe bigêro. Prosesê çareserîye se ra 70 paştî dîbî.

Labelê seba ke prosesî açarnê lehîya xo 3 serrî ra vêşêr o propaganda kenê. Na propagandaya leymine nêna qebûlkerdene. Tewr peynî ferman da û vat ke nê welatî de cayê şima çino, welatî terk bikerê. Erdogan her roja ke şino çimê şarî de qedêno û xo qij fîneno. Seke mayêk vana gureyê serekkomarî vilakerdişê çaye nêyo. Ez zî Erdoganî ra nê vana, tarîx do ramojno ke kam do şiro û kam do bimano. Ma tîya yê û ma do tîya bimanê.”