Îqtîdaro faşîst ê AKP-MHPyî keno ke barajê vîjnayîşî hendê se ra 7î bido war. Serekwekîla Koma HDPyî Merale Daniş Beştaş derheqê babetî de ANFyî rê qisey kerd.

Beştaşe vist vîrî ke no baraj semedê HDPyî ame ronayene û vat: ''Nika AKP seba ke wertaxê xo yê qijî (MHP) bixelisno barajî dano war. Ma sey partîya hîrên a Tirkîya xo ser eşkenê heta se ra 15î şirê. Xora eke şaretanê normalen de vîjnayîş bibo ma  rehet hendê se ra 20î genê. Ma semedê îtîfaqî heta nika berê xo nêgirewtî ewro tepîya zî do berê ma akerdebê. Êyê ke ma nêvînenê, nêeşkenê nameyê ma vajê xora înan reyde ma zî îtîfaq nêkenê. Eke yew îtîfaq bêro kerdene do nameyê ci bibo. Êyê ke ma nêvînenê, ma zî înan nêvînenê.''

Beştaşe wina dewam kerd: ''Ma zanê ke serkêşîya Hayatî Yaziciyî de komîsyonêk ameyo ronayene. Yew raştîye esta ke her hetê dinya de yena zanayene; patîyê îqtîdarî gama ke dest pê vînîkerdişî kenê, bi qanûnanê vîjnayîşî kay kenê. Îqtîdarê AKP-MHPyî zî semedê hêzê xo yo ke vînî kerdo peyser bifîno dest bi qanûnê vîjnayîşî kay keno. Xora Tirkîya de yew krîzê îdarekerdişî esto. Warê probleman her roje zêdîyenê û pîlêr benê. Heme anketan de yeno vînayene ke MHP nêeşkeno barajî ravero. No wardayîşê barajî xora eşkera semedê ey yeno kerdene.''

Meseleya ma sey barajî çîn a. Înan sere de semedê vergirewtişê kurdan baraj ard, nika zî semedê xelisnayîşê xo ane war. Bi barajî nêeşkayî verê HDPyî bîgirê. Nika krîmînalîze kenê, bi dewa û qedexekerdişê sîyasetî kenê ke HDPyî warê sîyasetî ra wedarê. Çunke tehemulê înan  têkoşînê demokrasîyî û muxalefetê demokratîkî rê çîn o. La rixmê heme hêrişanê îqtîdarî HDPyo ke heme barajî rijnayî, bi pîlbîyayîşî rayîrê xo rê dewam keno.''