Serekwekîla Koma HDPyî Merale Daniş Beştaş meseleya ke hemserekî prosesê çareserîye ra semed yenê hedefkerdene ANFyî rê ercnayî.

Beştaşe vist vîrî ke Suleyman Soyluyî bernameyêkê televîzyonî de qestî ra fotografê wextê prosesê çareserîye mojnayî û kerd ke komel de fikrêk virazo. Beştaşe bale ante ser ke prosesê çareserîye de seba ke beşdarî nêrê hukmkerdene qanûnêk amebi viraştene.

Beştaşe ard ziwan ke dewlete û îqtîdar zî muxatabêkê prosesê çareserîye bi û vat: ''Prosesê çareserîye rojê tewr rindî yê tarîxî bîyî. O çax komel de haştîye, hêvî, kelecan estbî. Ma tim paştî daye nê prosesî. Ma reyna vanê ke meseleya kurdan û demokratîkbîyayîşê Tirkîya yewbînan ra cîya nîyê, kurdan seba hemwelatîya têdûşte zaf bedelî dayî û na mesele pê dîyalogan çareser bena. Coka fikro ke Soylu wazeno awan bikero xelet o.''

Beştaşe nîqaşê 'qefilnayîşê HDPyî' ercnayî û vat: ''Êyê ke qels bîyê kenê ke pê hêrişê vera HDPyî payan ser o vinderê. Bê HDP Tirkîya do nêba. Ê HDP biqefilnê zî HDP do rayîrê xo dewam bikerê. Weçînitoxê HDPyî rojêke de do nêşorê partîyêka bîne. Wa her kes na raştîye hol biwano. HDP partîyêka meşrû û demokratîk a. Seba ke ma sey partîyanê bînan her roje hema çî nêvanê benê hedef.''

Beştaşe derheqê fezlekeyan de zî wina vat: ''Nika 200 fezlekeyî estê. Embazê ma hema zî zîndanan de yê. HDP rixmê fezlekeyan bi pîlêr û rayîrê xo dewam kerd. Coka goreyê ma nîqaşê serê fezlekeyan têna polîtîkayêk a. Ê bi nê hawayî wazenê îqtîdarê înan deewam bikero. Çunke HDP eşkeno pêro netîceyan bivurno. Nîqaşê qefilnayîşê partîya ma û qedexeyê 5 serran zî têna nîqaş ê. Çunke AKP MHP nêeşkenê Qanûnê Bingeyî bivurnê. Nê pêro kerdişê seba weçînayîşê muxtemelî dîzaynkerdişê muxalefetî yo. Tarîxê dinya û Tirkîya mojna ke eke îqtîdarêk pê qanûnanê weçînayîşî kay keno o hînî bin kewto.''