Serekwekîla Koma HDPyî Merale Daniş Beştaş derheqê qefilîyayîşê partîyan weçînayîşê muxtemelî yê verwextî de ANFyî rê qisey kerd.

Beştaşe vist vîrî ke ronayîşê Komara Tirkîya ra nata her tim partîyê sîyasîyî ameyî qefilnayene û îradeyê şarî ame binpaykerdene. Beştaşe vat: ''Qanûnê Bingeyî yê Darne de no esto. Eke merdim qala cuya demokratîke bikero ganî merdim bieşko xo bi azadî rêxistin bikero, raya xo bido. La Tirkîya bîya goristanê partîyan. No goristan heman wextî de goristanê şaran û îradeyê şaran o.''

Beştaşe bale ante ser ke AKP îqtîdar, hegemonya û zorbazîye ra zaf hes keno û nêwazeno înan biterikna. Beştaşe vat: ''AKP her çi seba îqtîdar xo keno, seba şarî çîyêk nêkeno.''

Beştaşe da zanayene ke ê seba weçînayîşê verwextî amade yê û vat: ''Meclîsê ma, partî, komîsyonê weçînayîşî, meclîsê cinîyan, LRN, koma meclîsî pêro rêxistinê ma weçînayîşî ra amade yê. Ma zaf reyî pê zor û zehmetîyan dekewtî weçînayîşî coka tecrubeyê ma esto. Ma şarê xo û rêxistinanê xo reyde weçînayîşî rê amade yê. Ma serrêke û nême ra nata vanê şertê weçînayîşê verwextî estê û ganî îtîfaqê demokrasî bêro awankerdene. Nika îtîfaqêko demokratîk û azadîwaştox çin o. La no nêno a mana ke weçînayîş do nêro kerdene. Ma ganî seba caardişê şertanê weçînayîşê verwextî bixebitê.''