Vengdayîşê Yewîya Hêzî ya Demokratîke û Federasyonê Elewîyan ê Îngilîstanî ser o bi hezaran kesan London de hêrişê polîsanê îngilîzan ê vera Merkezê Komelê Kurdan protesto kerd.

Meydanê Trafalgarî de girseyî afîş û fotografî akerdî, sloganê sey ''Bimiro faşîzm'', ''Jin, Jiyan, Azadî'' û ''Bê Serek Cuye Nêbena'' vatî. Kurdîstanijan flamayê Rayber Apoyî û alê YPG û YPJyî akerdî. 

War de nameyê Partîya Karkeranê Sosyalîstan Charlie Yoldaşî, Têgêrayîşê Edaletî û Têgêrayîşanê Komelê Yewbîyayeyî yê Barnetî ser o qiseykerdişî ameyî kerdene. Qiseykerdişan de ame vatene ke hêrişê faşîstî û barbarî yê dewleta tirke yê vera kurdan dewam kenê û Îngilîstan zî bîyo şirîkê nê operasyonê bêexlaqî û gemarinî.

Qiseykerdoxan bi tûjî Partîya Karkeran rexne kerde û vat: ''No faşîzm, kolonyalîzm û zulmê partîya îqtîdarî yê.''

Ame îfadekerdene ke polîsanê Îngilîzan waştişê dewleta tirke ser o eşto KCCyî ser û vat: ''Krîmînalîzekerdişê kurdan ra fek vera bidê. Destê xo serê kurdan ra biancê'' 

Dima girseyî ver bi Mudirîya Polîsan a Îngilîstanî (Scotland Yard) rayraşîyayîş kerd. Girseyî tîya de dosyayêke teslîmê mudirîye kerde û ver bi Serekwezîrîye rayraşîyayîşî rê dewam kerd. 

Nameyê DGByî ser o Îbrahîm Avcilî tîya de eşkerayîye wende.

Avcilî pare kerd ke sereştişê polîsan ê vera KCCyî hêrişê vera demokrasî bîyo û vat: ''Hêriş di hewteyî verî zîyaretê Wezîrîya Karanê Zereyî ya Tirkîya ra dima qewimîya. Aseno ke no hêriş goreyê peymananê bazirganî, leşkerî, dîplomatîkî, vera rêxistinanê kurdan ameyo eyarkerdene. Ma ancî vanê ke ma do nêbê hacetê bazarîyanê şima yê nimite û gemarinan.

Kurdan vera DAÎŞî rûmetê merdimatîye pawita. Coka hêrişê vera kurdan hêrişê vera merdimatîye yo. Ganî polîsê îngilîzî cade kurdan ra uzrê xo biwazê û destbendkerdeyan vera bidê.

Ma  venga dostanê xo, şorişgêr û demokratanê Îngilîstanî zî danê ke xoverdayîşî rê dewam bikerê. Ma kuçe û dezgehanê xo ra fek vera medê. ''

Girseyê şarî bi çepik û sloganan vila bi şa komêka ciwanan  meydan de bi govendan çalakîya xo rê dewam kerd.