Merkezê Komelê Kurdan ê Londonî (KCC) hetê polîsanê îngilîzan ra 27ê teşrîna peyêne de amebi îşxalkerdene. Îşxal û çalakîya grevê vêşanîye ya kurdan verê KCCyî de dewam kenê.

Kurdîstanijan û dostanê înan ancî xeyma grevê vêşanîye zîyaret kerde. Hemsereka Federasyonê Elewîyan a Brîtanya Dîleke Încedal û Muslum Dalkiliç, Serekê Mala Cemî Îbrahîm Has, îdarekaranê Merkezê Komelê Kurdan û Tirkan (Day-Mer) û endam û îdarekaranê Komeleya Kulturî ya Karkeranê Koçberan (Gîk-Der) xeyme zîyaret kerde.

Şaredara Haringeyî Peraye Ahmet û endamanê Meclîsê Şaredarîye Ajda Ovat, Erdal Dogan, Mike Hakata û Anna Abela zî xeyme zîyaret kerde.

Peraye Ahmeta ke Qibrisî ra ya, xebatkaranê Meclîsê Şarê Kurdî ra derheqê rewşa peyêne de agahîyî girewtî. Peraye îfade kerd ke kurdî parçeyê komelî yê û vat: ''Polîsî kurdan krîmînalîze kenê û ma ney qebul nêkenê. Sey şaredarîye ma paştî danê komelê kurdan û bi pêro îmkananê xo do tîya de bibê. Ez wazena îfade bikera ke ma embazanê xo de grevê vêşanîye de yê.''

Şaredarê Enfieldî Ergîn Erbîlî zî xeyme zîyaret kerde û vat: ''Ez sey kurdêkî tîya de ya, tîya komeleya ma ya.''