Seba serweşîya Bubo Taşo ke vera tecrîdkerdişê Rayberê Şarê Kurdî Abdullah Ocalanî bedenê xo dabi adirî ver, bi girseyan zîyaretî ameyî kerdene. Hemserekê KCDyî Bedran Ozturk, Hemssereka DBPyî Salîha Aydenîz, Vervatoxa HDPyî Ebruye Gunay, îdarekarê HDPyî û DBPyî û xeylêk kesî şîyî serweşîye. Girse verî Siteyê Biçûkî ra ver bi Keyeyê Serweşîye yê Ofîsê Taxa Îstasyonî şîyî. Rayraşîyayîş de vera sloganê 'Şehîd namirin' ame vatene.

Hemsereka Pêroyî ya DBPyî Salîha Aydenîz xeyma serweşîye de qisey kerd û vat: ''Çalakîya Taşî mojnena ke ewro tecrîd vera ma pêroyînan yeno caardene. Seba ke Birêz Ocalan binê tecrîdî de yo vera şarê kurdî zulm yeno kerdene. Çalakîya Taşî seba şiknayîşê tecrîdî rayîrêko girîng mojna ma. Ganî ma nê serewedaritişî bivînê. Bêrê ma ewî û îtîfaqo ke Buboyî waştbi xurtêr bikerê. Birêz Abdullah Ocalan do tecrîdî bişikno, dima pêro Kurdîstan do azad bibo.''

Berdan Ozturkî zî ard ziwan ke mefteyê çareserîye Abdullah Ocalan o û vat: ''Birêz Ocalan Îmrali de xo ver dano. Dişmenê şarî kurî tecrîdî giranêr kenê û dest pê şerî kenê. Dişmenî ewro çar parçeyanê Kurdîstanî de vera estbîyayîşê şarê kurdî şer dayo destpêkerdene. Coka çalakîya Buboyî çalakîyêka fîraz a. A raşte ma zî Abdullah Ocalan zî çalakîyêka winayêne nêwazenê. No mesaj seba muxalefetê Tirkîya mesajêko girîng o. Ganî meseleya kurdan çareser biba. Çareserîya meseleya kurdan bi Amerîka û Rûsya çareser nêbena; pê wedaritişê tecrîdî û azadîya Ocalanî çareser bena.''