Amed de serkêşîya Komeleya Paştdayîşê Keyeyanê Şehîdan (MEBYA-DER) de arîfeyê Roşanê Qûrbanan de mezelê şehîdan ameyî zîyaretkerdene. Bitaybetî dewa Çeme Êlîkanî ya qezaya  Licê de Şehîdgehê Sipênî û Mezelê Sîse û qezaya Pîranî de Mezelê Pîrejmanî ameyî zîyaretkerdene.

Wekîlê Partîya Çep a Keske yê Amedî Serhat Eren û îdarekarê partîye yê qeza û merkezî û îdarekarê HDPyî yê Pasur û Lîcê tewrê zîyaretê Şehîdgehê Sipenî bîyî. Hemserekê MEBYA-DERî Şehmus Karadagî û wekîl Serhat Erenî zîyaret de qisey kerd.

Karadagî vat, "Domananê Kurdîstanî çirey vera sîstemî de milê xo çewt nêkerd. Semedê azadîye merg girewt çim. Rixmê mergî û tepiştişnayîşan nê şarî vera nê sîstemê leyminî qet çirey peyser game nêeşte.” 

Karadagî bale ante tecrîdê serê Rayberê Şarê Kurdî Abdullah Ocalanî ser û nê vatî: "Seke şima zî zanê bi serran o Rayberê Şarê Kurdî Birêz Abdullah Ocalanî ra xebere nîna girewtene. No tecrîd vera heme kurdan yeno caardene. Heta ke no tecrîd nêro wedaritene ne çareserî bena ne zî azadîye. Ma emser zî binê tecrîdî de kewnê roşanî. Ma do vera sîyasetê leyminî yê AKP-MHPyî de bêveng memanê. Ma tîya ra roşanê Birêz Abdullah Ocalan û tepişteyanê sîyasîyan ê bînan bimberek kenê û înan rê silam û heskerdişê xo şawenê.”

Serhat Erenî zî vat, “Bi serran o kultur û ziwanê ma bine zextî de yê. Hemra û şarê ma çirey vera zextan milê xo çewt nêkerd. Eke tecrîdê serê Birêz Ocalanî bêro wedaritene têna semedê kurdan nê semedê heme şaranê Tirkîya do bibo vengê haştîye. Seba ke no şer bêro vindarnayene gerek ma bibê yew û paştî bidê yewbînan."

Pîran de serkêşîya MEBYA-DERî de Mezelê Pîrejmanî ame zîyaretkerdene. Îdarekarê HDP, Partîya Çep a Keske yê bajar û qeza û Hemserekê KCDyî Bedran Ozturk tewrê zîyaretî bîyî. Rîyê qerarêkê Qeymaqemîya Dîcle ra heyet nizdê mezelan de hetê cendirmeyan ra ame vindarnayene. Heyetî tîyara verê xo da Pîranî û mezelê şehîdan zîyaret kerdî.

Licê de zî Hemsereka MEBYA-DERî Yuksele Almas, Mayê Haştîye, TJA, Wekîla Partîya Çep a Keske ya Amedî Adalete Kaya, Hemserekê HDPyî yê Amedî Zeyyat Ceylan tewrê zîyaretan bîyî. Keyeyan verî mezelê ke ameyî texrîbkerdene, înan ser lawikî vatî.

Hemsereka MEBYA-DERî Yuksele Almas mezelan de wina qisey kerd: “Heta ke ma weş bê ma do şehîdanê xo esas bîgêrê. Ma do tim înan zîyaret bikerê. Her wext ke ma yenê mezelan ser ma vînenê ke mezelî ameyî texrîbkerdene. Ê se kenê wa bikerî, ma do tim şehîdanê xo zîyaret bikerê. Ma do semedê haştîyêka birumete têkoşînî rê dewam bikerê.”

Hêna Çewlîg, Îzmîr, Adana û xeylêk bajaranê bînan de zî bi wesîleya roşanî mezelê şehîdan ameyî zîyaretkerdene û mesajê wayîrvejîyayîşê têkoşînê şehîdan ameyî dayene.