Rayaberê Şarê Kurdî Abdullah Ocalano ke 25 serrî yo Îmrali de binê tecrîdê giranî de yo 40 mengî yo tira qet xeberêke nîna girewtene. Pêvînayîşê keye û avûkatanê ci yenê qedexekerdene. Dezgehê eleqedarî yê Ewropa ke Tirkîya sûcdar kenê nêşinê Tirkîya ser ke wa goreyê qanînî têbigêro.

Avûkatanê Rayberê Şarê Kurdî Abdullah Ocalanî ra Îbrahîm Bîlmez Ofîsêê Cenevre yê Neteweyanê Yewbîyayeyan (NY) de tewrê konferansêk bi û qala bêhuqûqîya Îmraliyî kerd. Avûkat Îbrahîm Bîlmezî ANFyî rê qala  xebatanê înan ê vera tecrîdî kerd.

Îbrahîm Bîlmezî vat: ''Ma xelêk wext Mehkemeya Heqanê Merdiman a Ewropa (MHME), KOnseya Ewropa (KE) ser o mekanîzmayê huqûqê mîyanneteweyî şuxilnayî. MHME hema cewabê muracatê ma yê 12 serran nêdayo. Ma verî muracatê NYyî kerdêne.  Ma 29ê temmuza 2022yî de muracatê Komîteya Heqanê Merdiman a NYyî kerd. Na komîte sey MHME wezîfeyê mehkemeya mîyanneteweyî  zî vînena. MHME ra ferqê ci o yo ke heme dinya de selahîyetdar o.

Na komîte 6ê êluna 2022yî waştişê ma qebul kerd û hukmatê Tirkîya ra waşt ke wa tedbîr bîgêro.  Komîte vat şertê tecrîdî nînê qebulkerdene û waşt wa cadê Abdullah Ocalan û tepişteyê bînî yê Îmraliyî avûktanê xo de pêvînayîşê bêsînor bikerî. Tirkîya rixmê nê qerarê komîte çîyêk nêkerd. Ma reyna xebere dayê Komîteya Heqanê Merdiman a NYyî. Naye ser o çeleyê 2023yî de reyna tedbîr waşt la Tirkîya no waştiş zî nêard ca.

Ewro Komîteya Heqanê Merdiman a NYyî de mehkemeya hema dewam kena. Ma pê bawer ê ke komîte Tirkîya bikero mehkum. Çunke tecrîd ne goreyê Pêkerdişê Heqanê Merdiman ê Ewropa, ne goreyê pêkerdişanê NYyî ne zî goreyê qanûnê bingeyî yê Tirkîya yo. Ma 17 gulana 2024î de zî muracatê Raportorê  Îşkenceyî yê NYî kerd. Çunke şertê Îmraliyî şertê îkneceyî yê.

Ma 2014 de muracatê MHME kerd. MHME qerar girewt ke cezaya muebetê giranî  madeyê 3. ê Pêkerdişê Heqanê Merdiman binpay keno. Yanî vato Îmrali de qedexeyê îşkenceyî yeno îxlalkerdene. Bi vatişê bînî vat Îmrali de îşkence est o. Goreyê nê qerarê MHME muwekîlê ma 2024î ra nata binê îşkenceyî de yê. Dosyayê ma NY de dewam kenê, ma pê bawer ê ke Tirkîya do bêro mehkumkerdene.''