Komîteya Vergirewtişê Îşkenceyî ya Konseya Ewropa (CPT) zîyaretê xo yê peyênî yê Tirkîya de nêşi Îmrali. Avûkatê Buroyê Huqûqî yê Asrinî Îbrahîm Bîlmezî tewirê CPTyî ANFyî rê ercna.

Bîlmezî da zanayene ke CPTyî înan reyde pêvînayîş zî nêkerd ke buro bi hawayêkê nîzamî agahîyan dano CPTyî.

Bîlmezî vat: ''CPT qaşo vera îşkence û kerdişanê xiraban ronîya. Eke CPTyî raşta zî Zîndanê Îmraliyî bikerdêne rojdemê xo tecrîd hende giran nêbibîyêne. Na rewşe mojnena ke huqûq û sîstemo mîyanneteweyî senî nêzdîyê Zîndanê Îmraliyî beno. Seba ke tecrîd beno giran meseleya kurdan çareser nêbena. Coka huqûq û sîyaseto serdest o mîyanneteweyî tecrîd û meseleya kurdan ra berpirsîyar o. Komployê Mîyanneteweyî ra nata kerdişê Îmraliyî wina yê. Ocalan tim babetanê cîyayan ser o qisey keno û pêşnîyazanê xo pêşkêş keno. Pêşnîyaz û ercnayîşê Ocalanî na cografya de yenê teqîbkerdene û cewabê xo vînenê. ''

Bîlmezî bale ante grevê vêşanîye yê zîndanan ser û vat: ''Heyf ke na rewşe asta tecrîdî ya Îmraliyî mojnena ma. 15ê nîsana 2015î ra ancax netîceya grevanê vêşanîye de ma eşkerayî Birêz Ocalanî bivînê. Eşkera yo ke tepişteyî kêmasîya huqûq û sîyasî ra grevê vêşanîye kenê. Polîtîkaya tecrîd û konseptê şerî qet rojdemî ra nêvejîyayî. Têna ge ge asta xo vurnaye. Heqê pêvînayîşî yê Birêz Ocalanî tim bi babeta bazarî û şantajî. Meseleya kurdan meseleyêka tewr pîle ya Tirkîya ya. Ewro seba çareserîya meseleya kurdan firsendêko pîl esto. O firsend zî pê afernayîşê şert û mercanê çareserîye yê seba Birêz Ocalanî beno. Rewşêka eqse de heman polîtîka do dewam bikera.''