Roniştişo 80in ê Komîteya Vergirewtişê Îşkenceyî ya Neteweyanê Yewbîyayeyan (NY) dewam keno. Roniştiş de raportorê taybetî Maeda Naokoyî tecrîdê vera Rayberê Şarê Kurdî Abdullah Ocalanî ser o agahîyî pêşkêş kerdî û tay çîyî pers kerdî. Nameyê Tirkîya ser o Hetkarê Mudirê Pêroyî yê Zîndanan Fatîh Gungorî îdîa kerd ke rewşa sey tecrîdî qetî çin a û pêvînayîşî sebebê 'cezayanê dîsîplînî' ra yenê qedexekerdene.

Avûkatanê Buroyê Huqûqî yê Asrinî ra Îbrahîm Bîlmezî derheqê babete de ajansê ma rê qisey kerd. 

Bîlmezî ard ziwan ke 'cezayê dîsîplînî' bi hawayêkê bêhuqûqî dîyenê û vat: ''Nê cezayî ma rê nênê vatene. Ancax raporanê CPTyî de ma eşkenê sebebanê nê cezayan bivînê. Ê seba ke tecrîdî rê bahane bivînê bi sebebanê bêeqlan cezayanê dîsîplînî danê. Her hîrê mengan de yew cezaya dîsîplînî dîyena Birêz Ocalan û tepişteyanê Îmraliyî yê bînan. No çi dûştê Qanûnê Înfazî yo.  La eke babete Îmrali bo huqûq nêno caardene. Muwekîlanê ma bi seyan reyî îtîrazê nê cezayan kerd. Ma sey avûkatan 25 serrî yo muracat kenê la netîce nêgênê.''

Bîlmezî bale ante ser ke sebebê cezayan înan rê nênê vatene û avûkatî bi hawayêkê nîzamîyî îtîrazê cezayan kenê. Bîlmezî vat: ''Rewşa normale de ganî sebebê cezaya dîsîplînî avûkatan rê bêrê eşkerakerdene. Ma nameyê muwekîlanê xo ser o muracatê taxmînîyî kenê. Ma zanenê her hîrê mengan de yew cezayêke do bidîya. Coka ma îtîrazanê xo zî kenê. Ma ancax raporanê CPTyî ra eşkenê sebebê cezayan bimusê. Mîsal heqê tepişteyan est o ke hewte de saetêke hîrê kesî aktîvîteya sporî de  bêrê yewca. Raporan de sebebê cezayan ra yew no bi: 45 daqîqayan spor ameyo kerdene û 15 deqayanê peyênan de bi volta sohbet ameyo kerdene. Seba ke 60 deqayî bi temamî spor nêameyo kerdene ceza dîyaya muwekîlanê ma. Yanî qiseyê selahîyetdarê wezîrîye raşt nîyê. Ê kenê ke bêhuqûqîya xo bi bahaneyan binimnê.''