Birdal: Ganî her kes nê qîrayîşî biheşno

Serekê Pêroyî yê ÎHD’yî yo verên Akin Bîrdalî vat ke bi tecrîdê girankerdeyî yê serê Ocalanî dormeyê cimatî ameyo girewtene.

Serekê Komela Heqanê Merdiman o verên Bîrdalî vat, “Bi tecrîdî cimat yeno cezakerdene. Mîlyonan kesî rêzdar Ocalanî sey rayberê xo vînenê û seba naye zî tecrîd nêno qebûlkerdene.”

Çalakîya grevê vêşanîye ya Hemsereka Kongreya Cimatî ya Demokratîke (KCD) û parlamentera HDP’yî yê Colemêrgî Leyla Guven a ke vera tecrîdkerdişê Rayberê Şarê Kurdî Abdullah Ocalanî daye destpêkerdene roja 138’ine de dewam kena. Serekê Pêroyî yê Komela Heqanê Merdiman (ÎHD) o verên Akin Bîrdalî derheqê tecrîdê girankerdeyê serê Rayberê Şarê Kurdî Abdullah Ocalanî û grevê vêşanîye yê bêdem û bêagêrayîşî de ANF’yî rê qisey kerd. Bîrdalî da zanayene ke tecrîdo girankerde yê serê Ocalanî temamê cimatî girewto xo dest û ard ziwan ke hemsereka Kongreya Cimatî ya Demokratîke Leyla Guvene bi çalakîya xo rîyê gemarin ê cimatê mîyanneteweyî teşhîr kena.

Tecrîdî wedarê

Bîrdalî, polîtîkayê AKP’yî yê tecrîdkerdişê Îmraliyî û Ocalanî rexne kerdî û wina vat, “20 serrî yo ke Îmraliyî de bêhuqûqîye esta. Tarîxê sîyasetê dinya de yeno dîyayene ke serê xeylî Rayberanê Şaran de tecrîd tewr zêde 10-15 serrî ameyo kerdene. La çi heyf ke 20 serrî yo bi hawayêkê sîstematîkî tecrîd bi rêzdar Ocalanî yeno kerdene. 27’ê Temmuze 2011’î ra nata avûkatî bi tu hawayêkî nêeşkenê rêzdar Ocalanî reyde pêvînayîşan bikerê û tu xebere girawa Îmraliyî ra nêna girewtene. Seba ke Tirkîya nê persan hal bikera ganî  her çî ra ver tecrîdî wedara. Berpirsîyarê tecrîdî hukmatê AKP’î yo. Heta ke tecrîd wina dewam bikero bêhuqûqîye û bêedalet zî Tirkîya de do dewam bikero. Seba ke tecrîd, çareserkerdişê persêka şarê Kurdan asteng keno. Heta ke persa Kurdî çareser nêba her roje persî zêde benê.”

Şexsê Ocalanî de cimat yeno cezakerdene

Bîrdalî da zanayene ke şexsê Ocalanî de cimat yeno cezakerdene û ard ziwan ke bi mîlyonan kes rêzdar Ocalanî sey rayberê xo vîneno û seba naye zî tecrîd nêno qebûlkerdene. Bîrdalî da zanayene bi tecrîd serê rêzdar Ocalanî haştîye û demokrasî zî tecrîd kenê û wina vat, “Hemsereka KCD’yî Leyla Guvene bi çalakîya grevê vêşanîye yê bêdem û bêagêrayîşî waşt bale bianca na babete ser. Eynî wext de çalakîya Guvene bale ante serê nêçareserkerdişê persa Kurdî û bêhuqûqî û bêedaletîya Îmraliyî. Bi rojan o zerrîya mi Amed de erzena. Enqera de seba babeta tecrîdî ma waşt bi selahîyetdaran de pêvînayîşan bikerê, la çi heyf ke muxatab çin ê. Ma verî zî şahîdîya grevê vêşanîye kerde. Muxatebêk amebi dîyayene û mesela amebî açreserkerdene. Tecrîd ma hemeyan ser o yeno kerdene. Leyla Guvene zî waşt bale bianco serê çaresernêkerdişê persa Kurdî. Guvene giranîye şertanê hepisxaneyan musna ma.”

Ma veng bidê nê qîrayîşî

Bîrdalî da zanayene ke Leyla Guvene 138 rojî yo vera tecrîdî grevê vêşanîye de ya û wina dewam kerd: “Ez venga heme cimatê Tirkîya û dinya dana. Ma veng bidê nê qîrayîşî û nê qîrayîşî berz bikerê. Nê têkoşînê edalet û huqûqî yo. Ewro bi hezaran girewteyan bedenê xo xo dayo verê mergî û grev de yê. Ma wezaretê edaletî û hukmatî ra wazenê huqûq û qanûnanê xo bîyarê ca. Tecrîd sucê merdimîye yo. Tecrîd teyna Îmraliyî de nêno kerdene, heme Tirkîya binê tecrîdî de ya. Seba naye zî ma reyna wazenê tecrîd bêro wedaritene. Welat zî binê tecrîdî ra bivejîyo.”