Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grev 107 zîndanan de pê beşdarîya 2 hezar tepişteyan roja 63. de dewam keno.

Serekê Rûmetî yê ÎHDyî Akin Bîrdalî  ANFyî rê tecrîd û grevê vêşanîye yê tepişteyan ercnayî.

Bîrdalî eşkera kerd ke tecrîd hetê huqûqê zere û mîyanneteweyî ra sûcêk o û dûştê haştîye yo. Bîrdali da zanayene ke tecrîd qestî ra seba ke meseleyê verênî bêrê mîyankerdene visîya dewre. Bîrdali vist vîrî ke grevê vêşanîye yê 2018 de 9 ciwanî merdî û ganî a rewşe ra ders bêro girewtene.

Bîrdali vat: ''Seba ke na rewşe raşt biba ganî merdimî bimirê yan zî seba ke veng bêro vetene ganî verî grev bivurîyo grevê bêagêrayîşî? Ganî tecrîd û no grevê vêşanîye bibê rojdemo verên. Tecrîdê vera Abdullah Ocalanî yeno manaya netîceya çaresernêkerdişê meseleya kurdan.''

Bîrdalî pare kerd ke eke tecrîd biqedo haştîya komelkî zî virazîyena û seba naye zî ganî cade konferansê haştî û demokrasî bêro kerdene. Bîrdalî ard ziwan ke ganî çareserîya meseleya kurdan biba madeya yewîne ya rojdemê komelî.