Çarçewa Kampanyaya Wextê Azadîye ya ke wextê verê cu hetê  Kongreya Komelê Demokratîkî (KCD), Têgêrayîşê Cinîyan ê Azadan (TJA), Partîya Herêmanê Demokratîkan (DBP) û Partîya Demokratîke ya Şaran (HDP) ra ameye despêkerdene de ewro Şirnêx de têhetameyîşê şarê ame kerdene.

Hemsereka Pêroyî ya DBPyî Salîha Aydenîz û Hemsrekê Pêroyî yê HDPyî Mîthat Sancar ke şiyî Şirnex pê konvoyêkê dergî hetê bi hezaran kesan ra ameyî verwazîkerdene. Aydenîze û Sancarî şarî reyde govende girewte.

Şarî Botanî heta merkezê Şirnexî her ca de vejîya serê rayîrî konvoy  selam kerd. Merkezê bajarî de hemserekî pê sloganan û coşa pîle ameyî verwazîkerdene. Botanijan pê sloganan tecrîdê serê Rayberê Şarê Kurdî Abdullah Ocalanî şermezar kerd û xoverdayîşê zîndanan selam kerd.

Aydenîze pê vatişê ez ''xoverdayîşê şima selam kena'' dest pê qiseykerdişî kerd û nê vatî: ''Înanê ke vatêne ma şarê Şirnexî qedînayo wa bêrê nê meydanî vînê.  Ê bi xo verê xoverdayîşê şarî de qedîyayî. Vera nê şarî her qeyde polîtîka rayra berde. Şarê kurdî çirey gamêke peyser nêeşte.  Pê tecrîdî her ca açarna warê şerî. La wa nayî bizanê ma do Rayberê Şarê Kurdî bikerê azad. Bi mengen o zîndanan de vera tecrîdî tepişteyî xover danê. Ê reyna semedê ameyoxê Tirkîya têkoşîn kenê. Ma Şirnexî ra zîndanan rê  bi hezaran selaman şawenê. Waştişê tepişteyan waştişê ma hemeyan o. Ma reyna veng danê, hema ke zîndanan de mergî nêqewimîyayî wa waştişê tepişteyan bêrê caardene.

Eke vengê Abdulah Ocalanî bêro eşnawitene meseleya kurdî çareser bena.  Eke meseleya kurdî çareser bo Tirkîya heme meseleyî çareser benê. AKP seba ke meseleyanê Tirkîya çareser nêkero, tecrîd ano caardene. Abdullah Ocalan muxatabê kurdan o. Bi mîlyonan kurdî vanê Abdullah Ocalan îradeyê min o.  Heta meseleya kurdî bi metodanê demokratîkan nêro çareserkerdene Tirkîya de darbeyî û şer nêqedîyenê. Kurdî azadîya xo wazenê. Tecîrd bingeyê şerî yo.  Hêrişê vera Rojawan û Başûrî zî netîceya tecrîdî ya. Kurdî ganî vera nê şerî  yewîya xo ya neteweyî ronê.  Îqtîdaro faşîst ê AKP-MHPyî ewro Başûr de hêrişê desgketeyanê kurdan û êzidîyan keno. Vera nayî ganî ma bibê yew û wayîrê ercanê xo vejîyê. Semedê statuyê kurdan ganî ma nayî bikerê. Bi serran o ma zaf bedelî dayî la çirey ma çok nêda. Nika wextê azadîye yo.''

Mîthat Sancarî zî vat: ''Ma do vera blokê otorîterî îtîfaqê azadîye ronê. Nê blokê rantî heme çimeyê şarî semedê şerî, qesr û patşgêranê xo xerc keno.  Coka welat de bêkarîye û vêşanîye estê. Zîhnîyetê nê blokî sey DAÎŞ û Talabanî yo. Vera blokê camêrdê serdestî ma do îtîfaqaê cinîyan ronê. Rayîrê ma eşkera yo. No rayîrê azadîye, demokrasî û haştîye yo. Nê welatî heta ke HDP çînêbo, îradeyo hempar ê şaran çînêbo bedilnayîş nêbeno. Heta ma çînêbî çareserî nêbena.''