Brîtanya de seba turê diyînî yê weçînayîşê serekkomarîye yê 28ê gulane de 20ê gulane de raydayîşî dest pêkerd û siba zî qedîyeno. Seba raydayîşî London, Manchester, Leicester û Edinbourgh de sindoqî ronîyayî. Brîtanya de şar herikîyeno sindoqan ser. 3 rojan de tewr tay 53 hezar kesan raye daye. Şar serê sindoqan de vano: ''Qesawet vurîya hêvî û xoverdayîşî.''

Zeynepe Kayaya 86 serre ya ke wextê Terteleyê Dêrsimî de dadîya xo ra bîya, tertele vist vîrî û vat: ''Seba ke reyna tertele nêbo, cinî û ciwanî nêkişîyê ez ameya ke raya xo bida.''

Vervatoxa Komîsyonê Weçînayîşî yê Partîya Çep a Keske yê Londonî Arzuye Peşmen pare kerd ke ganî weçînitoxî lîsteyanê weçînitoxan û sîteya YSKyî ra qeydê xo kontrol bikerê.

Aktîvîsta Merkezê Komelê Kurdan û Tirkan (Day-Der) û muşahîda Partîya Çep a Keske Elîfe Karabulut vat: ''Seba ke rûmetê xo bipawê ma bêrê serê sindoqan, raya xo bidê. Qesawet vurîya hêvî û xoverdayîşî. Bêrê ma pîya nê xoverdayîşî bivurnê serkewtişî.''

Besê Kurban îfade kerd ke seba ke tedaya vera şarê kurdî wedarîya aye raye daya û vat: ''Ma pê zulm, teda û qirkerdişan zaf çîyî destî ra dayî. Seba ke dadîyî nêbermê mi raye daye. Seba ke ciwanî abigêrê welatê xo û bi azadî biciwîyê mi raya xo daye.''

Koçer Koçerogluyî da zanayene ke 14ê gulane de şarê kurdî lapatêk da rejîmê AKP-MHPyî û vat: ''Ma hêvîya xo Rayber Apoyî ra girewte. Qetî ma do ser bikewê.''

Weçînitoxa bi nameyê Yelda vat: ''Seba ke weçînayîş turê diyînî rê mend mi bire daye ke raya xo bida. Turê yewinî de şexso malûm ser nêkewt. Yew hêvîye est a; ma do aye pîl bikerê.''

Nuştox Kazim Kiliçî vat: ''Wa her kes bêro raye bido. Seba ameyoxê roşnî, vera şer û zulmî vajê hînî bes o û raya xo bidê.''

Weçînitoxa bi nameyê Candane Kaya vat: ''Turê diyînî de çoşêko rind qewimîya. Ma do pê rayanê xo nê sîstemî bivurnê.''