Hemsereka Pêroyî ya HDPyî Pervîne Buldan hêrişê çekdarî ra dima şîye Îzmîr û verê bînaya partîye de eşkerayîye daye. Buldane keyeyê Denîze Poyraz ra serweşîye waşte û wina vat: ''Rehma Homayî Denîze rê ba. Sereyê keyeyê aye, embazanê aye û partîya ma weş bo.''

Buldane dima wina qisey kerd: ''No cînayet yew nîyo. Ma nê cînayetî û versûcî zaf dîyî. La vera kesanê ke ma rê vatêne şima do koletîye bikerê, ma qetî rûmetê xo ra tawîz nêdê, ma çok nêşîyî erdî ro û ma qetî milê xo nêard war. Ma naye ra pey zî çok nêşorê erdî ro. Ewro seba ke qirkerdişêkê pîlî bikero kiştoxêk erşawîya tîya. La têna Denîze zere de bîye. Eke no kiştox nêm saete erey biameyêne zere do qirkerdişêko pîl bikerdêne. Verê çimanê her kesî de kiştoxêk heta goreyê vatişan 3 tenan qirkerdiş kerd. Asan nîyo ke verê çimanê polîsan de bi rehetî bikewê na bîna. Ma zanenê ke no hêriş plankerde yo. Ma zanenê ke kamî fermanê nê hêrişî dayo û çita kewto destê ci. 

Ma venga Serekkomaro ke vatêne 'Nê rojê şima yê holêr ê' danê na cumle ra qestê ci çita bi? Ey zanayêne no qirkerdiş do bêro kerdene. Nê welatî de agahîya înan pê milçîkan zî esta. Nê welatî de HDP ça de nefes bigêro hayîya şima pê esta. Şima mejbûr ê nê kiştoxî ma rê eşkera bikerê. Hînî bes o. Ma soz danê Denîze, verê edaletî de ma do qetî hesabê ney bipersê. Kiştoxî do hesab bidê. Wa kes nêvajo 'Ma serweşîye waşte, telefon kerd û tweet eşt.' Ewro tam roja yewca ameyîşî ya. Ewro wexto winasên o ke gereka her kes tîya de bo.

Ma reyna şîyar kenê ke tehamulê ma nêmendo ke ma Denîzêka bîne vînî bikerê. La ma bi hezaran, bi mîlyonan estê. Ganî cade mesuldarê nê serebûtî bêrê eşkerakerdene û cezakerdene. Ganî no nêro vîrakerdene. Guleyo ke kewto Denîze têna aye rê nêerzîya.''