Hemserekê cinîyî yê HDPyî yê şaristanan semedê plansazîya dewrê neweyî serkêşîya Hemsereka Pêroyî ya HDPyî Pervîne Buldan û Vervatoxa Meclîsê Cinîyan Ayşe Acar Başaran reyde Merkezê Pêroyî yê HDPyî de kom bîyî.

Buldane kombîyayîş de qisey kerd û vat: ''Ewro her partî ra zêdêr HDP de îdarekar û sîyasetmedarê cinîyî estê. Ma parlamento de koma cinîyan a xosere awan kerde. Ma xîret kenê ke sîyasetê cinîyan rê hîna aktîf dewam bikerê. Cinîyî bi xurtî wayîrê têkoşînê xo vejîyenê. Ma do budçe bikerê budçeya cinîyan.

Îqtîdarê AKP-MHPyî wazeno HDP warê sîyasetî ra tasfîye bikero. Dişmenê înan ê verênî HDP û cinî yê. Hişmendîya înan manena yê Talîban û DAÎŞî. HDp wina yew partî ya ke eşkena welat îdare bikera. Ganî ma vera nê sîyasetê rijnayîşî sey cinîyan bibê yew û rayberîya vurîyayîşî bikerê.

Meseleya bîne ya pîlêre zî tecrîdê Îmraliyî yo. Ma eşkenê pê geşkerdişê demokrasî û edaletî tecrîdî bişiknê. Wa her kes vera tecrîdê Îmraliyî tewirêkê hemparî bimojno. Ma do sey cinîyan vera ney têkoşînê xo xurtêr bikerê. Roşnîya cinîyan do tarîtîya welatî biqedîna.''