Hemsereka HDPyî ya Pervîne Buldan kombîyayîşê grûba partîya xo de rojdem ercna. Buldane îdîayê îqtîdarî yê vera HDPyî cewab kerdî û qewimîyayîşê Garê ercnayî.

Qiseykerdişê Buldane ra qismêk wina yo:

Ziwanê Dayîke

''Bi wesîleya 21ê Sibate Roja Ziwanê Dayîke ez roja heme şaranê ke Tirkîya de vera qedexeyê ziwanan têkoşînê estbîyayîşî danê, pîroz kena. Hêrişê vera ziwanî hêrişê estbîyayîşê merdimîye yê. Ma zî mîyanê partîya xo de dest pê perwerdeyê kurdkî kerd. Mucadeleyê ma yê seba perwedeyê ziwanê dayîke do dewam bikero.

Garê de 13 kesî kerdî qûrbanê hesabênê sîyasîyan

Îqtîdar tim hesabdayîşî ra biremo zî ma do qala Garê bikerê û hesabê ci bipersê. Garê nûqtaya şikyayîşî ya zaf muhîm a. Berpirsîyarê mergan no îqtîdar o. Garê reyna ramojna ke îqtîdaro ke pê şerî wazeno payra bimano welat fînayo çi hal. Îqtîdar cewabê persena ma yê Garê nêdano. Seba ke sûcdarê remenê, Garê ra remanê.  Îqtîdar meselaya Garê de sûcdar o. Eşkera yo ke waştişê înan xelisnayîşê ê merdiman nêbi. Eke raşta wina biwaştêne wîna nêkerdêne.  Operasyon nê dîyalog vîjnayêne. Ma zanê ke heta nika pê rayîrê dîyalogî 335 kesî ardîyayî Tirkîya.  Nînan ra mîyanê heyetêk de ez bi xo estbîya. Seba ke ma nînan zî bîyarê ma veng da hukmatî la înan goş ma sera nêna. Garê de 13 kesî kerdî qûrbanê hesabênê sîyasîyan.

Dinya de çala tewr xorî aya ke  Anqara de îqtîdar kewto de

Îqtîdar seba ke nêrasayo waştişanê xo yê sîyasîyan hêrişê HDPyî keno. Estbîyayîşê xo çînbîyayîşê HDPyî ya girê dayo. Vanê wa HDP bêro qefilnayanê yewna çî nêvanê. Pê dişmenîya vera kurdan wazenê îqtîdarî xo bidê domnayene. AKPyîjo ke vîjnayîşê 31ê adare de bin kewt nêşarmîyeno  vîjnayoxê HDPyî rê zewtan dano. Eşkera îftîra erzenê ma. Wezîrêkê înan fotografan ramojneno û vano wekîlêka ma şîya Garê. Na zûra boçin a. Seba ke sûcê xo binimnenê nêzanê se bikerê Embaza ma Dîlane zî vizêr cewabê înan da. Dinya de çala tewr xorî ya a ke Anqara de îqtîdar kewto de. Wezîro ke îftîrayan erzeno ma eşkera yo ke çimê ci cayê Erdoganî de yo. Pêrodayîşê xo yê îqtîdarî eşkera bikerê. Werkna to verî ê fotografî bimojnayêne Erdoganî. Erdogan o prosesî zaf hole zano.

Prosesê Haştîye

Seba ke no zat fehm nêkeno ez ci rê yew bi yew vajî. Hole goştarî bikerê, hole bimuse ke o wext se bi. Ma prosesê haştîye hîrê lingan ser o rayra berd. Linga verêne Îmrali, linga dîyine Qendîl û linga hîrêne hukmat û dewlete. Heme pêvînayîşê ke ma o proses de Îmrali de birêz Ocalanî reyde kerdî hayîya hukmat û dewtele ci ra bibî û înan tesdîq kerdî. Reyna bi zanayîşê hukmat û dewlete ma şîyêne Qendîl. Netîceyê pêvînayîşanê Qendîlî ma heyetê hukmat û dewlete rê pare kerdene. Heyet zî hema ke ma nêşîyê înan bi xo ê zanayîşê Îmrali de resnayêne birêz Ocalanî. Dima heyetê ma şîyêne Îmrali û birêz Ocalanî derheqê pêvînayîşê heyetê dewlete de zanayîş dayêne ma. Ma zî nê resnayê Qendîl û PKKyî. 

Seba ke wa zerrîya yewî de bibo kul ez nayî zî vajî. Ma pêvînayîşê Qendîlî binê ÎHAyan de ke dewlete semedê asayîşî dana firdayene de kerdêne.Serekê to yê pêroyî mektubo ke ma Qendîlî ra do biardêne biheyecanî pawitêne. Soylu Beg!

Pê zûre û îftîrayan şima nêeşknê berpirsîyarîya xo ra biremê. Wextê prosesê haştîye de ma rê çi ame vadkerdene eke wextê ci bêro ma do înan zî eşkera bikerê. Şima se kenê bikerê, şima nêeşkenê verê ma bîgêrê.

Wazenê qesasê Garê HDPyî ra bigerê

Seke yeno zanayene wekîlê ma, embazê ma Omer Faruk Gergerliogluyî rê cezaya ke bîlasebeb ameye dayene hetê mehkemeya berze ra ameye tesdîqkerdene ke talîmatê nayî Qesre ra ame. Eşkera yo ke wazenê qesasê Garê HDPyî ra bigerê. Çend vînî keneê hende tersenê, çend tersenê hêrişê HDPyî kenê. Ma zî vanê ke destê şima ra çi yeno bikerê. Kam ke şima ra biterso mela sey şima bo. Gergerlioglu wîjdanê komelê Tirkîya yo. Eyb o, şerm o, heyf o. Çîyo ke Gergerlioglu semedê şarî keno bi seyan wekîlanê şima ra yewî nêkerdo. Sînayeyî Erene Keskîn û Şebneme Korur Fîncanci yê ke vengê wîjdan û heqîqatî yê ê zî hedef de yê. Şima nêeşkenê nê vengê bibirnê.

Mucadeleyê edaletî do dewam bikero

Birêz Ocalano vat ''eke firset bêro dayene ez meselaya krudî hewteyêk de çareser kena'' binê tecrîdê xorî de yo. Vera nayî zîndanan de grevê vêşanîye ke ameyî destpêkerdene kewtê roja 89. Eke şima meseleya kurdî teslîmê leşker polîsan kenê sîyaset qey esto? Mesleya se serran pê operasyonan nîna çereserkerdene. Senî ke înanê ke mergan ser o waştênê îqtîdarê xo ronê şîyî, şima zî do şirê. Ma sîyasetê demokratîkî rê israr kenê. Ma xeta mutabaqatê 28ê sibate çirey canêverdenê. Hewceyo tewr pîl haştîye, demokrasî û edalet ê.Coka ma Kampanyaya ''Semedê her kesî edalet'' daye destpêkerdene. HDP kelaya demokrasîyî ya ke nêrijîyena.''