Hemsereka Pêroyî ya Partîya Demokratîke ya Şaran (HDP) Bervîne Buldan merkezê patîya ci de derheqê operasyonê qirkerdişê sîyasîyî yê vizêrî de kombîyayîşê çapemenî kerd.

Buldane ard ziwan ke înan kombîyayîşê xo yê vizêrînî yê Heyetê Rayberdişê Merkezî de operasyonî çarçewa hîra de girewtî dest û planêk kerd. Buldane  wina dewam kerd: ''Embazê ma yê ke vizêr ameyî destbendkerdene ameyî ardene Anqara. Badê operasyonî wayîrvejîyayîşêko gird qewimîya. Ma semedê paştdayîşan spas kenê.

 4 serrîyo hemserekê ma Selahattîn Demîrtaş û Fîgene Yuksekdag zî tede parlamenter û hemşaredarê ma tepişteye yê. A roje ra nata operasyonê vera ma bêmabên dewam kenê. Bi qeyûman û operasyonan xîret kenê ke destkewteyanê HDP û kurdan xesp bikerê. Operasyonê vizêrî zî dewamê derbayanê sîyasîyan yê AKPyî yo. Embazê ma yê ke ameyî destbenkerdene têna xebata demorasî rayra berda çîyêko pê bêrê sûcdarkerdene nêkedo.

AKP seba ke qet yew sîyasetê xo de ser nêkewt, nêeşkeno walatî îdare bikero  hêrişê HDPyî keno. Rojdemî bedilneno û vînîkerdişê xo pê nê hêrişan nimineno. Çalakîyê 6-8ê Têşrîna Verêne protestoyê şaranê Tirkîya yê vera DAÎŞî bi. Xora ûca 53 kesê ke merdî ra 47ê înan HDPyîj bî. Qet cipersayîş nêame akerdene kesê ke ameyî mirêneyene qet nameyê înan ranêvereno, têna kesêkî ser ra operasyon kenê. Ma xeylêk rey seba ke 6-8ê Teşrîne Verêne bêrê cipersayene vernîyaz da la AKPyî red kerd. 6 serrî ravêrtî nika sey çîyêko neweyî reyna fînen rojdem.

Ma sey HDP, sey kurdî, sey cinî , sey muxalafî zanî şima senî zulMê kurdan kenê. Ma dewrê Kenan Everenî Tansu Çîler ra zanê. Kurdî bi serran o nê zulmî vînenî la çirey verê şima de milê xo çewt nêkerd. Ma ewro zî bi eynî qerardarîye vanê ke ma do çirey vera kay û zuranê şima de milê çewt nêkerê. Komel û şarê Tirkîya hînî şima sarisneno. Şima do vînî bikerê, çend hêrişê bikerê hende vînî bikerê. Çarçewa huqûqî de, sandiqê vîjnayîşî de do şima ra hesab bêro persayene. Wa naye ra şikê şima çînê bo. Ewro ganî her wextî ra zafê rayîr û metodê pîya têkoşînkeridşî bêrê vînayene. Bindestî do serkewteyê nê prosesî bî. HDP do serkewteyê nê prosesî bo. HDPyî milê xo çewt nêkerd, do nêkero. No zî wa şima rê derd bo.''