Heyetê Pêroyî yê Meclîsî de bi wesîleya 23’ê Nîsane kombîyayîyêk ame viraştene. Gama ke hemsereka Pêroyî ya Partîya Şaran a Demokratîkî (HDP) Pervîn Bûldane qisey kerdêne Serokkomarê Tirkî Erdoganî Heyetê Pêroyî terk kerd.

Buldane  êyê ke Soma, Roboskî, Gezî û  Amed de ameyî qetilkerdene û Recep Hantaşo ke tewr peynî de Amed de ame qetilkerdene ardî vîrî û va: ‘‘Heta ke qetilkarê înan mîyan ma de bî, ganî ma senî edaletî ra qisey bikerê. Buldane bale ante îşkence serê dayîkan û va: ‘‘ Ma nuqtaya ke merdimîye erdî ra yena kaşkerdene de yê.‘‘ Buldane hêrişê vera Kiliçarogluyî zî sey ceribnayîşêkê neweyî yê Madimakî name kerd. Buldanê vera YSK’yî zî hêrsê xo ard ziwan  û vat ke şarî rê dame ame ronayene. No vera îradeyê şarî derbe yo. Buladane grevê vêşanîye yo ke rayberî Leyla Guvene de dewam keno vist vîrî û va: ‘‘ Parlameto û hukmat ganî vengê parlamentera ma ya ke rewşa ci bîya krîtîke, bieşnawê û gamanê huqûqî bierzê.  Tena ma eşkenê bi edalet û demokrasî na tengayî ra bivejîyê.‘‘