Hemsereka Pêroyî ya HDPyî Pervîne Buldan kombîyayîşê Meclîsî de qisey kerd û babetê rojdemî ercnayî.

Qiseykerdişê Buldane ra beşêk wina yo:

''Îqtîdar hînî nêeşke no îdare bikero, ekonomî rijîyeno. Îqtîdar her roje her kesî keno hedef. Şar çareserîye wazeno. Cinîyî her roje kişîyenê. La çareserîya îqtîdarî betalkerdişê Peymana Îstanbulî yo, xespkerdişê wekilîya Omer Faruk Gergerlîogluyî û muhakemekerdişê Mayanê Şemeyî yo.

Ma têkoşînê demokrasî kenê û ma do rayîranê girewteyan yew bi yew abikerê. Bira dewaya qefilnayîşê HDPyî 31ê adare de dîyaye. Îqtîdar seba ke sîstemê bêedaletî û talanî bido dewamkerdene hêrişê HDPyî keno. Na dewa dafik a. Peynîya na dewa de ê do bin bikewê. Ma do heta peyên xo ver bidê. Wa kesê wayîrwijdanî, hêzê demokrasî û huqûqî vera nê komployî vejîyê û wayîrê HDPyî vejîyê.

Dewlete Îmrali de huqûq binpay kena. 10 serran de seba pêvînayîşî 951 reyî muracatî ameyî kerdene la têna cewabê 5 muracatan dîya. Pêvînayîşê keye û avûkatan bi hawayêkê keyfî yenê astengkerdene.

Hewteyê vîyarteyî de keyeyî Birêz Ocalanî reyde telefon de pêvînayîşêko kilm kerd, Ocalanî nê pêvînayîşî de qala bêhuqûqîye kerde û waşt ke avûkatanê xo bivîno. O çax telefon ame birnayene. pêvînayîşê telefonî nîyo. O pêvînayîşê telefonî nîyo, dewamkerdişê tecrîdî de israr o.No yeno manaya berdewamîya tecrîdî. No nêno qebulkerdene. Çira telefon ame birnayene û avûkatî nêerşawîyenê pêvînayîşan?

Mefteyê çareserîye caardişê demokrasî, sîyaseto azad û huqûqo unîversal o. Coka ganî tecrîd bêro wedaritene û rayîrê dîyalogan bêro akerdene.  Wedaritişê tecrîdî do şaranê Tirkîya rê fayde bido.  Newroze de zî bi mîlyonan kesan waşt ke tecrîd wa bêro wedaritene. 124 rojî yo seba wedaritişê tecrîdî grevê vêşanîye dewam keno. Ganî no grev bêro dîyene. Ez venga Komîsyonê Cigêrayîşî yê Heqanê Merdiman ê Meclîsî dana ke  wa grevê vêşanîye bigêro rojdemê xo. Ma venga CPTyî danê ke wa vera na bêhuqûqîye tewirê xo bimojnê.

Peymana Îstanbulî seba cinîyan têkoşînêko hempar o. Pawitişê na peymane yeno manaya pawitişê cinîyan o. Ma venga cinîyan danê ke ganî ma wayîrê destkewteyanê xo vejîyê.

Ma Amedî ra vejîyayî rayîr, Îzmîr û Ege de goş da şarî ser. Wan û Serhed de ma xizanîye û bêkarîye dîye. Mersîn û Dengizê Sipî de ma berardoxî goşdarî kerdî. Ma Dengizê Sîya de zî meseleyê şarî goşdarî kerdî. Her cade heman meseleyî estê.

Wa kes qesawet nêkero. Îqtîdar nika tersê vînîkerdişî de yo. Ma do ser bikewê. Wa rayîrê ma akerde bo.''