Meclîsê Cinîyan ê HDPyî yo ke verê Kongreya Girde ya 4. 6 herêman de kombîyayîyaş viraştî Anqara de Kongreya xo ya 3. virazeno. Cîya cîya dezgehan ra xeylêk temsîlkarî zî tede 400 cinîyî tewrê ci bîyî.

Qiseykerdişê akerdişê Hemsereka Pêroyî ya HDPyî Pervîne Buldan kerd. Buldan a ke bi  silamkerdişê sîyasetmedaranê tepişteyan dest pê qiseykerdişê xo kerd hîrê cinîyê şorişgêr ê kurdî Sakîne Cansiz, Fîdan Dogane û Leyla Şeylemez ê ke paytextê Faransa Parîs de ameyî qetilkerdene yad kerdî. Buldane vat: ''Seba ke demê çareserîye yo ke hetê Birêz Ocalanî ra ameyêne rayraberdene bêro pûçvetene nê hîrê cinîyê şorişgêrî ameyî qetilkerdene. Reyna Sêvê Demîr, Pakîze Nayîr û Fatma Uyar yê ke têkoşînê cinîyan de  cuya xo vînî kerde ma înan zî yad kenê û vanê ke dewa înan resnayîşê serkewtişî deynê milê ma yo. ''

Buldane vat: ''Ma cinîyê ke binê dara HDPyî de ameyî pêser û destê yew bînan tepiştê bi qerarê ke ma do têkoşînê xo biresnê serekwtişî. Coka îqtîdar bi heme hêzê xo yeno ma ser. La ê se kenê wa bikerê nêeşekenê îradeyê şarî û HDPyî bişiknê. Hêzê cinîyan ra tesenê coka hêrişê ma kenê. Êyê ke bi hêrişan wazenê ma bifînê bin do ê bi xo vîn bikerê.  Ê do mîyanê tarîya xo de bibê vînî. Ma do ser bikewê. Îradeyê kurdan nas nêkenê bi qeyûman îradeyê şarî xesp kenê. Sere de sîtemê hemserekîye wazenê destkewteyanê ma, ma dest ra bigêrê. Ma vera hêrişan xoverdayîşê reyna gird kenê.  Ma do heme destkewteyanê xo peyser bigerê. Îqtîdarê  AKP-MHPyî bi hêrişan peynîya xo ano.''