23ê nîsane de polîsan saetanê şewe de eşt televîzyonanê kurdan Stêrk TV û Medya Haber TVyî ser. Nêrazbîyayîşê vera medyaya azade dewam kenê.

Roja şemeyî (27.04.2024) saete 13:00 de Bruksel de do verê Qesra Edaletî de (Place Poelaert 1, 1000 Bruxelles) mîtîngê ‘Çew Nêeşkeno Vengê Çapemenîya Azade Bibirno’ bêro kerdene.

Kedkaranê çapemenîye yê kurdîstanijan seba mîtîngî vengda. Eşkerayîye de hêrişê vera televîzyonanê kurdan ame vîrardene û nê ameyî vatene: “Waxtê sereştişî de wayîrê şîrketî û xebatkarê televîzyonî nêgêrîyayî zere. Polîsan berî şikit, panelê ekranî cayê ci ra vetî, kabloyî birnayî, masayî vila kerdî, heta vilîkî eştî erd û studyoyî ser û bin kerdî.

No hêrişê bêhuqûq bi waştişê yewna welatî ame kerdene. Çi heyf ke meqamê Belçîka zî bi krîmînalîzêkerdişê kurdan û dezgehanê kurdan tewrê bazirganîya leymine ya mabênê welatan bi. No hêriş senî ke vera heqê xebergirewtişê kurdan o vera çapemenîya azade û
erjanê demokratîkan o.

Ma sey rojnameger, roşnvîr, nuştox, kedkaranê çapemenîye na rewşe çirey qebul nêkenê, protesto kenê. Sere de dezgehê çapemenîye yê Belçika ma veng danê heme rayapêroyîye ke wa vera neheqîye vejîyê û paştî bidê medyaya kurdan. Nê semedî ra ma veng danê ke tewrê mîtîngê ma bibê. Paştdayîşê şima do hêz bido ma.”