Hemsereka Pêroyî ya HDP’yî Pervîn Buldane derheqê grevanê vêşanîye de Merkezê Pêroyî yê HDP’yî de eşkerayêk daye çapemenîye.

Buldane ard vîrî ke Leyla Guvene 110 rojî yo grevê vêşanîye de ya û vat, “Grevê vêşanîye êdî resto sewîyêka krîtîke. Rixmê vengdayîş û cehdkerdişê ma zî hukmatî gamêk nêşete. Îqtîdar vera nê çalakîyanê ma teberê bêvengî û astengîye de çîyêk nêkeno. Rayraşîyayîşê parlamenteran o ke Amed ra ame destpêkerdene bi telîmatanê Wezîrê Karê Zereyî waşt ke  bêro astengkerdene. La rixmê heme nê astengan zî hevalanê ma barîkatî derbaz kerdî. Tecrîd tena persêka şarê Kurdî û HDP’yî nîyo.”

Buldane veng da meclîs, hukmat û rayepêroyî  û va, “Tecrîd ganî cade bêro wedaritene. Hîna ke kesêk nêmerdo ganî tecrîd bêro wedaritene. Ganî Wezîrê Edeletî çi hewca keno bikero. Heme partîyê ke meclîs û teberê meclîsî de yê ganî vera tecrîdî hîsgêr bê. Tecrîd tena birêz Abdullah Ocalanî rê nêno kerdene, heme Tirkîye rê yeno kerdene. Ma vengdayîş bi serekê meclîsî zî kenê û vanê ke ganî waştişanê Leyla Guvene bigê verê çiman û gamêk bierzê. Leyla Guvene tek parlamenter a ke meclîs de sond nêwendo û dest bi wezîfeyan nêkerda. Waştişê hevalanê ma vera huqûqî nîyê, ganî bêrê qebûlkerdene û hukmat û Wezîrê Edeletî goreyê qanûnan tê bigêrê.

Kesê ke hepisxaneyan de wayîrê heqanê ke keye û avûkatanê xo reyde pêvînayîşan bikerê yê. Nê wareyî de tecrîd tena Îmraliyî de serê Rayberê Şarî Kurdî Abdullal Ocalanî de esto. Birêz Ocalan zî sey her kesî wayîrê nê heqî yo. Ganî tecrîd cade bêro wedaritene. Eke çîyêkê xirabî biqewimîyê nê ra hukmetê AKP'yî berpirsîyar o.”