Wekîlanê DEM Partî 7ê kanûne de seba ke tecrîdê vera Rayberê Şarê Kurdî Abdullah Ocalanî bêro wedaritene muracatê Komîsyonê Cigêrayîşê Heqanê Merdiman (ÎHÎK) ê Meclîsî kerdbi. Mudirîya Pêroyî ya Zîndanan a Wezîrîya Edaletî cewab da muracatî û îdîa kerd ke Îmrali de tecrîd çin o.

Buroyê Huqûqî yê Asrinî vera zûra ''Îmrali de tecrîd çin o'' ya Wezîrîya Edaletî nêrazîbîyayîşê xo bi eşkerayîyêke mojna. 

Eşkerayîye de dîya zanayene ke Îmraliyî ra 38 mengî yo xeberêke zî nêna girewtene û Wezîrîye cewabê xo de teyna serra 2023yî ser o ercnayîş kerdo. Eşkerayîye de wina ame vatene:

''Wezîrîye cewabê xo de vato ke cezayanê dîsîplînî ra 2023 de pêvînayîşê bi keye û avûkatan nêameyo kerdene la eşkera nêkerdo ke çira nê cezayî dîyayê. Wezîrîye cewabê xo de vato ke seba ke qalê 'tecrîdî' bêro kerdene ganî têkilîyêke qetî nêra kerdene û pêvînayîşî nênê astengkerdene.

La panc pêvînayîşê avûkatan ê 2019î ra ber 27ê temmuza 2011î ra nata 13 serrî yo avûkatann muwekîlanê xo yê tepişteyanê Îmraliyî de pêvînayîşêk zî nêkerd. Ancî 6ê teşrîna verêne ya 2014î ra nata teyna 5 reyî keyeyan pêvînayîş kerd.

Veysî Aktaş, Hamîlî Yildirim û Omer Hayrî Konar Îmrali de 9 serrî yo qetî avûkatanê xo de pêvînayîş nêkerd. Aktaş û Konarî 2015 ra nata 3 reyî û Yildirimî zî di reyî pêvînayîşê keyeyan kerdî. 

Teyna 27ê nîsana 2020î û 25ê adara 2021î de pêvînayîşê telefonan ameyî kerdene. Naye ra ber pêvînayîşê bi telefonî nêame kerdene û 38 mengî yo mektuban rê cewab nêdîyeno. 

25ê adara 2021î de muwekîlanê ma bi telefonî keyeyanê xo de qisey kerd. Ê çaxî ra bata nînan ra xeberêke nêna girewtene. 

Muwekîlê ma Veysî Aktaşî 28ê nîsana 2024î de înfazê xo temam kerd. Rixmê ney zî o vera nêdîya û tehlîyeya ci serrêke ameye taloqkerdene. Ma derheqê ney de muracatê xo dezgehanê eleqedaran rê kerdî. Hakîmîya Înfazî zî bire daye ke îtîrazê avûkatan bêro astengkerdene. Bi nê hawayî Birêz Aktaş û muwekîlê ma yê bînî teber de bê pawitişê avûkatan yenê verdayene.

Îmraliyî ra hîrê serrî yo xeberêke nêna girewtene ke na rewşa tecrîdê girankerdeyî tîpê îşkenceyê vera merdimatîye yo. Eşkera yo ke rejîmê tecrîd û îşkenceyî yê Îmraliyî hinî nêno îzehkerdene. Ma venga Wezîrîya Edaletî danê ke peynîya bêhuqûqîye bîyara, azadîya muwekîlanê ma xesp nêkera. Ma venga Serekîya Meclîsî, wekîlan, ÎHÎK û rayaumûmîya demokratîke zî danê ke seba sîstemê huqûqî yê demokratîkî û ameyoxêkê haştîyaneyî verê kerdişanê sey tecrîdî bigêrê.''