Bado ke Îdarekarê Weşanê Pêroyî yê Tele1î Merdan Yanardagî programêkî de tecrîdê serê Rayberê Şarê Kurdî Abdullah Ocalanî rexne kerd, munaqeşeyî dewam kenê.

Yanardagî vat, “Tecrîdê serê Ocalanî gereyê huqûqî nîyo. Gerek bêro wedaritene. Nêeşkeno keye û avûkatanê xo bivîno. Wina sîstemêkê înfazî beno?”

Buroyê Huqûqî yê Asrinî da zanayene ke seba ke vera tecrîdî qisey kerdo, derheqê Yanardagî de cipersayîş dîyayo destpêkerdene û vat, “Gerek vera rejîmê tecrîdî yê Îrmaliyî û ê yê ke tecrîd anê ca, cipersayîş bêro kerdene. ”

Eşkerayîya Buroyê Huqûqî yê Asrinî de hêna ame vîrvîstene ke Abdullah Ocalan û tepişteyê bînî yê Îmraliyî Omer Hayrî Konar, Hamîlî Yildiri û Veysî Aktaşî ra xebere nînan girewtene û ca dîya nînan: 

"Îmrali de heq û azadîyê bingeyênî yenê binpaykerdene. Îmrali de îşkenceyo giran yeno kerdene. 27 mengî  yo ma rixmê heme muracatan Birêz Ocalan û muwekîlanê xo yê bînan ra ma nêeşkenê xebere bîgêrê. Hemê tekîlîyê înan bi teberî ameyî birnayene. Derheqê rewşa înan a weşîye û şertanê înan de qet zanayîşê ma çîn o.

Serra 2006-2007 de Tirkîya de hîrê mîlyonan ra zafêr kesan îmzayî şawitî meclîsî û 2013 de des mîlyonan ra zafêr kesan îmzayî şawitî Konseya Ewropa û azadîya Birêz Ocalanî waşte.

2022 de netîceya  muracatê ma de Komîteya Heqanê Merdiman a Neteweyanê Yewbîyayeyan qerarê tedbîrî girewt û hukmatê Tirkîya ra vat gerek avûkatê Birêz Ocalanî bê astengîyan cade muwekîlê xo bivînê. 2023 de no qerar hêna hukmatî rê ame vîrvîstene la hukmatî hema zî no qerar nêerdo ca. Seba ke no qerar nêame caardene û tecrîd yeno domnayene sûcê îşkenceyî yeno kerdene. Ma veng danê hukmat û Wezîrîya Edaletî ke wa nê qerarî cade bîyarî ca û caardişanê îşkenceyî biqedînê.”