Rayberê Şarê Kurdî Abdullah Ocalan, Hamîlî Yildirim, Omer Hayri Konar û Veysî Aktaşî ra 38 aşmî yo xebere nîna girewtene. Burroyê Huqûqî yê Asrinî derheqê muwekîlanê xo de buroyê xo yê Beyoglu dî kombîyayîşê çapemîye kerd.

Avukat Rezan Sariciyî vist vîrî ke Îmrali de têna qedexe û cezayê dîsîplînî sînordar nîyî û vat: “Keye û avûkatan reyde pêvînîyîşî nînê kerdene, mektûb û telefon yenî astengkerdene. Derheqê rewşa muwekîlanê ma de zanayîşê ma çîn o. Muwekîlê ma Veysî Aktaşo ke 30 serrî yo zîndan de yo ganî 28ê nîsane de biameyêne tehlîyekerdene la tehlîyeya ci ameye peydeeştene. No qerar goreyê qanûnî nîyo, azadîya Birêz Aktaşî ameye xespkerdene.

Muwekîlê ma rixmo ke serrê înan aver şîyî xeylêk wexto şertanê zîndan de yê ke zor danê weşîya înan. Hem hetê huqûqî hem zî hetê erjanê merdimîye ra ganî vera îşkenceyî bêro vindetene. Coka ma heme kesanê ra yê ke xo berpirsîyar hesibnenê, hasasîyet pawenê û veng danê selahîyetdaran ke wa wezîfeyê xo bîyarî ca. Wa na rewşa îşkenceyî cade bêro qedînayene û berê Îmraliyî hetê azadîye rê bêrê akerdene. Ma veng danê ke wa Birêz Aktaş cade bêro serbestveradayene û muwekîlê ma cade keye û avûkatanê xo reyde pêvînayîşan bikerê.”