Partîya Çep a Keske çarçeweya kampanyaya vîjnayîşê 14ê gulane de Meydanê Îstasyonî yê Yenîşehîrê Amedî de  bi tewrbîyayîşê bi des hezaran mîtîngê fînalî kerd. Bi des hezaran kesan yew fekî ra sloganê "Jin, jiyan, azadî" ve "Bijî serok Apo" vatî.

Hemserekê KCDyî  û namzedê Amedî Berdan Ozturkî bi coşêkê girdî xîtabê şarî kerd. Sloganê "Amed ramekewe, wayîrê azadîya xo biveje" ser o Ozturkî vat o bi  Amedî sereberz o. Ozturkî wina qisey kerd: "7 serrî yo kurd û kurkî yenê înkarkedene. Şima ewro tîya ra cewabo tewr pîl da ci. Amed Kurdîstan o, Kurdîstan tîya de yo. Pê xorîkerdişê tecrîdî waşt ke kurdan bêîrade biverdê û biqedînê. Birêz Ocalan rayîrê haştîye û demokrasîyê yo. Wa bêrê bivînê kurdî senî payra yê û wayîrê îradeyê xo vejîyenê. Şarê ma têna raya xo dano Partîya Çep a Keske."

Hemsereka Pêroyî ya DBPyî Salîha Aydeniz zî nê vatî: "Gama ke qala Amedî yena kerdene, çar leteyê Kurdîstanî yenê vîrê ma. Xoverdayîş û  têkoşîn yenê vîrê ma. Wa her kes biewno nê warî ra zafêr biterso.  Nê îqtîdarî bi heme dişmenanê kurdan îtîfaq kerd la şarê kurdî vera dişmenê kurdan û dişmenê cinîyan çirey do çok medo. Êyê ke Kurdîstan de raye wazenê, ma înan rê persenê şima derheqê tecrîdê giranî yê serê Rayberê Şarê Kurdî Abdullah Ocalanî dir senî fikiryenê? Nêzdîbîyayîşê Îmraliyî nêzdîbîyayîşê demokrasî û azadîye yo. Heta ke Ocalan azad mebo, ne kurdî ne zî tirkî benê azad. Gerek Birêz Ocalan bibo azad."

Vervatoxê Partîya Çep a Keske Îbrahîm Akin zî wina vat: "Zaf tay mend.  Rojêke mende, rojêke cuwa pê ma do înan bişawê. Rejîmê qesre tersî ra vînîkerdişê xo qebul keno. Siba ma do bi rayêke înan bişawê.  Ma do siba wezîfeyê xo yê tarîxî bîyarê ca, dima ra sindoqan bipawê û  15ê gulane de govende bigêrê."

Hemserekê Pêroyî yê HDPyî Mîthat Sancar zî nê vatî: "Amedî qerarê xo dayo, Amed amede o, Amed o nê welatî de serkêşîya bedilnayîşî bikero. Şarê kurdî kerdişanê şima xo vîra nêkeno. Qeyûman, dewayanê kumpasî, destbendkerdiş û tepiştişan, qedexeyê ziwanê kurdkî, hêrişê vera vîrî, şarê Amedî û kurdî xo vîra nêkenê. Îtîfaqo ke serê dişmenîya kurdan de ameyo ronayene, şarê kurdî nê zaf hole nas keno. Ma pê têkoşînî heta nê rojan ameyî, nika wextê înşakerdişê demokrasîyî yo. Ma siba morê xo danê binê dare ro, Çep a Keske şawenê meclîs û ameyoxê xo bedilnenê. Ma Erdoganî şawenê, rejîmê yewmerdimî qedînenê û rayîrê roşnîye akenê. Ma siba şinê sindoq ser û 15ê gulane de roja roşnî rê aye benê."