Vervatoxê Xîretê 78ijan Celalettîn Cano ke wextê prosesê çareserîye de mîyanê Koma Merdiman ê Aqilmendan de ca girewtêne derheqê tedayanê vera HDPyî de ANFyî rê qisey kerd.

Canî qala prosesê çareserîye û Koma Merdiman ê Aqilmendan kerde û vat: ''O çax firsendêk estnî ma zî waşt ke pê nê firsendî meseleya kurdan çareser biba. Beno ke çîyê pîlî nêqewimîyayî la ê serran tay merdimî merdî, dewaya kurdan geşêr bîye û qewimîyayîşê Rojawanî bîyî parçeyê nê prosesî.  AKPyî fam kerd ke proses goreyê zerrîya ci nêşino masa rijnaye. Înan waştêne kurdan manîpule bikerê, AKPyî verê ney girewt.''

Canî da zanayene ke ê prosesî de paştdayîşê seba HDPyî zêdîya û îqtîdarî zî no dî coka waşt proses birijno. Canî ard ziwan ke  çareserkerdişê meseleya kurdan derdê îqtîdarî nîyo û coka HDP keno hedef. 

Celalettîn Canî vat: ''Armancê dewaya qefilnayîşê HDPyî tasfîyekerdişê pêro meylan o la paştdayîşê seba HDPyî zêdîyeno. Wextê prosesê çareserîye de HDPyî se ra 6,7 rayî girewtêne dima rayê ci bîyî se ra 13. AKPyî waşt verê ney bigêro la paştdayîşê seba HDPyî zêdîyeno.''