Cenayaza ke Sûr de ameye dîyene ya Hakan Arslanî ya
Ame testpîtkerdene ke cenazaya ke qezaya Sûrî ya Amedî de ameye dîyene ya Hakan Arslanî ya.
Qezaya Sûrî ya Amedî ya ke wextê hêrişanê qirkerdişî yê mabênê serranê 2015-2016î de tede pêkewtişî qewimîyayî bî de 7ê sibat a 2021î de esteyê definkerdeyî ameybî dîyene.
Keyeyê Hakan Arslanî yo ke 22ê çeleyê 2016î de dinyaya xo bedilnaye cenazaya ci kişta Camîyê Hasirli de ameye definkerdene, muracatê Serdozgerîya Komare ya Amedî kerdbi û vatbi beno ke cenazaya lajê înan a.
Badê testê DNA nimûneya babî Alî Riza Arslanî bi yê Hakan Arslanî se de 60 tepiştbi. Serdozgerîya seba ke tam bêro safîkerdene sereyê menga teşrîna verêne de dayîke Melîke Arslanî ra zî semedê DNA nimûneya gonî waşt. Badê testê ame zelalkerdene cenaza qetî ya Hakan Arslanî ya. Cenazaya Hakan Arslanî do badê otopsî do bidîyo keyeyê ci.
