19ê kanûna 2017î de taxa Oleka Jore ya Bedlîsî de Goristanê Garzanî ra cenazayî ameybî remnayane û Goristanê Kîlyosî yê Îstanbul de ameybî definkerdene.

Goristanê Kîlyosî ra cenazaya gerîlaya PKKyî Leyla Kaya testê DNA ra dima hetê keyeyê ci ra ameye girewtene. Keyeyî Hemserekanê ANYAKAY-DERî Sultane Karasu û Şehmus Işikî reyde cenaza teslîm girewte.

Cenaza mîyanê kutuya plastîke de dîyaye keyeyî. Keyeyî esteyî pê kutu kefen kerd û nimajê cenaza kerd. Cenaza ameye berdene qezaya Gimgimî ya Mûşî.

Dadîya Leyla Halîde Kaya remnayîşê cenazayan sey 'zulm' pênase kerd û vat: ''No zulm do zerar bido înan zî. Ez venga keyeyanê şehîdan dana ke wa pê çêrî û sereberzî bêrê cenazayanê xo bigêrê. Domananê ma seba armancêkê ercîyaye têkoşîn kerd. Ganî ma wayîrê domananê xo vejîyê û pê înan sereberz bibê. Domananê ma seba nê armancî xo feda kerd.''