Zulkuf Gezen seba wedaritişê tecrîdkerdişê Rayberê Şarê Kurdî Abdullah Ocalanî Hepisxaneyê Tîpê T’yî Hûmara 2’yîne yê Tekîrdagî de çalakîye kerde û şehîd kewt.

Cenazeyê Gezenî berde Rasteyê Teyareyan ê Ataturkî yê Stenbolî û ameyêne pawitene ke cenaza  bi teyara serê şodirî saete 09:50 de bêra Amed û Goristanê Yenîkoyî yê qezaya Baglarî de bêra wedarnayene.

Labelê polîsanê Tirkî cenazaya Gezenî morgê Rasteyê Teyareyan ê Ataturkî yê Stenbolî ra bê xebere keyeyê Gezenî arde Amed. Ame zanayene ke, polîsan saet 00:20 de keyeyê Gezenî yê Amedî gêrayî û ci ra vat, “Ma do cenaza emşo wedarê. Şima wazenê beşdarê ci bê, eke nêwazenê zî şima zanê.”

CENAZA BI HAWAYÊKÊ KORSANKÎYÎ AMEYE WEDARNAYENE

Parlamenterê HDP'yî seba ke cenaza bigîrê şîyî Rasteyê Teyareyan ê Amedî, labelê polîsan verê ci girewt. Parlamentera HDP'yî ya Amedî Remziye Tosune ard ziwan ke, dormeyê rasteyê teyareyan ameyo girewtene û destûr nêameyo dayene ke ê bikewê zere. Parlamentera HDP'yî ya Êlihî Ayşe Acar Başarane zî vat, “Cenaza bi hawayêkê korsankîyî ameye remnayene û arda Amed. Rasteyê Teyareyan kerdo sey qereqolî û destûr nêdanê ke ma bikewê zere. “

Parlamentera HDP'yî Pero Dundare, Musa Farisogullari, Remziye Tosune, Nuran Îmîre, Feleknas Ûca, Salîha Aydenîze û Ayşe Acar Başarane seba ke cenaza bigîrê verê xo da Rasteyê Teyareyan ê Amedî. Labelê bi seyan polîsan û wesayîtanê zirxan dormeyê rasteyê teyareyan ame girewtene û destûr parlamenteranê HDP’yî rê nêame dayene. Polîsan bi mertalan dormeyê parlamenteran girewt. Mudirê polîsan parlamenteran ra vat ke ê do destûr nêdê înan û vat, “Ez dewlet a, qerarê dewlete esto. Şima eşkenê serweşîye keyeyî rê biwazê, labelê wextê wedarnayîşê cenaza de şima nêşekenê beşdarê ci bibê.”

Bado polîsan cenaza girewte  bi wesayîtanê rangeran û sîvîlan berde Goristanê Yenîkoyî. Polîsanê Tirkan bi wesayitanê zirxan dormeyê goristanî girewt û nêverda parlamenterî xo biresnê goristanî. Cenaza hetê polîsan ra ameye wedarnayene ke wextê wedarnayene de tayî ferdê keyeyê zî amade bîyî.