Hedîye Balur 8ê adara 1994î de Adana de dadîya xo ra bîya ke aslê xo de qezaya Hezexî ya Şirnexî ra ya. Hedîye 20 serrîya xo de tewra gerîlayan bîye û 7-8ê gulane de Koyê Bagokî yê qezaya Nisêbînî yê Mêrdînî de netîceya bombardumanê SÎHAyan de pa 5 gerîlayan şehîd bîye. 5 cenazayê bînî teslîmê keyeyan ameye kerdene la yê Hedîye 127 rojî yo nêdîyena keyeyê ci.

Keyeyê aye morg de cenazaya ke tira 450 gram mendo netîceya testê DNA de teşhîs kerde  û waşt ke cenaza bigêro û defin bikero. La waştişê keyeyî bêcewab ame verdayene.

Dadîya Hedîye Emîne Bulura 50 serre qala kênaya xo kerde û vat: ''Kênaya mi tim heqê cuye pawitêne. Qirkerdişê Roboskî, qirkerdişê Alî Îsmaîl Korkmazî zaf tesîrê aye kerd. Çîyo ke cenazaya ci rê ameyo kerdene ma zaf dejna. Wexto ke ma şîyî gonîye daye dozgerî vat ke 2 cenazayê cinîyî estê la nêşinasîyenê. Nika cenazaya aye ra 450 gram mendo la o zî nêdîyeno ma. Dewlete bi hawayêkê cîyakerî ewnîyena ma coka tira yew hêvîya ma nêmenda. Înan de merdimîye nêmenda.'' 

Babîyê Hedîye Mahmut Balurê 57 serrî zî vat: ''Leşkeran mi rê telefon kerd vat 'Ma kênaya to kişta berê bigêrê. Ma şîyî la o çax zî înan vat 'Şêrê 3 mengan ra dima bêrê.' Dima ke ma gonîye daye ma reyna şîyî Mêrdîn. O çax înan vat 'Cenazaya şima çin a. Tira 450 gram menda. Ma erşawîyayî dezgehê Tipê Edlîyî yê Îstanbulî. Ma nêzanenê çira înan cenaza şawita Îstanbul. Beno ke rojêke pê kargoyî cenaza bierşawê ma. Ê vera ma huqûqê dişmenîye kenê. Wijdanê înan çin o.

Heta ke ma esteyanê kênaya xo megêrê ma do nêvinderê. Tira 450 gram zî mendo ez do cenazaya kênaya xo bigêra û kişta embazanê ci de defin bikera. Nika ez zaf dejîyena. La rûmet û sereberzîya mi dejê mi ra pîlêr ê. Ganî ma kurdî bibê yew. Heta ke ma yew nêbê na rewşe do bêra ma ser. Ê bi hezaran serrî yo ma kişenê.Hişmendîya înan hertim heman a.''