Cenazaya Vedat Çem Erkmeno ke Zîndanê Tekîrdagî de amebii qetilkerdene bi şerto ke têna endamê keyeyê tewrê merasîmê definî bibê bajarekê Pazarcixî yê qezaya Dîgorî yê Qersî de ameye definkerdene.

Cenaza binê teda û zorbazîya polîsan de serê sibayî Îstanbulî ra ameye ardene bi Pazarcixî. Dekewtiş û vejîyayîşê bajarekî hetê polîsan û leşkeran ra ame girewtene. Wecîbayanê dînîyan ra dima zî tedaya polîsan de cenaza ameye berdene bi goristanê bajarekî.

Destûr nêdîya ke endamanê keyeyî ra berî çew tewrê merasîmî bibê. Dima ke cenaza ameye definkerdene polîs û leşkerî bajarek de mendî.

Polîsan nêverda ke cenaza hêverî bêra berdene bi camî. Malayê camî fermanê Muftuyê Qersî mojna û vat ke ê do meverdê cenaza debikewa camî. Selaya cenaza zî nêameye wendene, destûr nêdîya ke xeyma şînî bêra akerdene. Naye ser o keyeyê Erkmenî depoyêkê qijî de serweşîye qebul kerde.

Birayê Erkmenî Sayîm Erkmenî îfade kerd ke bê keye û avûkatan otopsî ame kerdene. Erkmenî vat: ''Vanê birayê mi hucreyê yewkesî de xo darde kerdo. No zor o, senî beno? Ma bawer nêkenê ke birayê mi xo kişto.'' Sayîm Erkmenî seba ke cenaza ameye remnayene nêrazîbîyayîşê xo mojna û vat: ''Embaz Vedatî no heq nêkerd. Seba ke tewrbîyayîş kêm bi ma tay şikîyayî.'' Erkmenî astengkerdişê wecîbeyanê dînîyan ser o zî vat: ''Dîn de çîyo winasên esto?''