Çalakîya ke verê Neteweyê Yewbîyayeyî de semedê paştdayîşê grevê vêşanîye yê tepişteyan ameye destpêkerdene de tecrîdê serê Rayberê Şarê Kurdî Abdullah Ocalanî ame şermezarkerdene û xoverdayîşê tepişteyan ame selamkerdene.
Verê Ofîsê Neteweyê Yewbîyayeyî (NY) yê Bajarê Cenevre yê Swîsre de semedê balantişê serê grevê vêşanîye yo ke vera tecrîdê serê Rayberê Şarê Kurdî Abdullah Ocalanî yeno kerdene, çalakîya roniştişî ke ameybî destpêkerdene, ewro zî dewam kerde.
Çalakîye ewro hetê aktîvîstanê Meclîsê Kurdî yê Zurihî ra ameye dewrgirewtene. Qiseykerdişan de xoverdayîşê Îmrali û zîndana ame selamkerdene û ame vatene ke ê do xoverdayîşê zîndanan rê bibê cewab. Çalakwanan vera Yewîya Ewropa û Neteweyê Yewbîyayeyan hersê xo ard ziwan û vat ê gereka mîsyonê xo bîyarê ca û vera dîktatorîya Erdoganî paştî bidê xoverdayîşê heqedarî yê kurdan.
Hetê bînî ra Swîsre de kampanyaya mektuban zî dewam kena. Reyna semedê tewrbîyayîşê çalakîyan zî ame vengdayene. Rojanê verê ma de Swîsre de do nê çalakîyî bêrê kerdene:
6ê sibate de saete 14.30 deLuzern de rayraşîyayîş do bêro kerdene. (Allmendmesse)
10ê sibate de Basel de rayraşîyayîşo derg do bêro kerdene.
11ê sibate de Solothorn de rayraşîyayîşo derg do bêro kerdene û kitabxaneyê azadîye bêro ronayene.
13ê sibate de Cenevre de do vêrê Neteweyê Yewbîyayeyî de mîtîngêk bêro kerdene.
