14ê hezîrana 2018î de qezaya Pirsûsî ya Riha de merdim û pawitoxanê wekîlê AKPyî Îbrahîm Halîl Yildizî hêrişê keyeyê Şenyaşarî kerd û 3ê înan keyeyê Şenyaşarî ra 4 kesî merdî.

Ewro Mehkemeya Cezaya Girane ya Meletî de roniştişê 7. yê dewaya qirkerdişî ame kerdene. Çarçewa dewa de Ferît Şenyaşaro ke bêtepiştiş yeno muhakemekerdene û merdimê  keyeyê Yildizî tewrê tewrê roniştişî bîyî. Reyna avûkatê pabesteyê OHD û avûkatê baroyanê Riha ,Amed, Dîlokî zî  tewrê mehkeme bîyî.

Verê roniştişî edlîye gerîyaye binê ablûqa. Hemserekê KCDyî Berdan Ozturk, Hemserekê Pêroyî yê DBPyî Salîha Aydenîz û Keskîn Bayindir û Wekîlê HDPyî Ayşe Surucu, Kemal Bulbul, Dersime Dag û Hasan Ozguneş zî roniştiş salon ra teqîp kerd. Rojnamegerî nêgerîyaye salone.

Fadil Şenyaşaro ke babî û di birayê xo qirkerdiş de vînî kerdî û birindar ame tepiştene Zîndanê Xarpêtî ra Enver Yildiz zî Zîndanê Osmanîye ra bi sîstemê SEGBÎSî  tewrê roniştişî bîyî.

Avûkatanê Şenyaşaran derheqê esasî de pawitiş kerd, Enver Yildizî pawiitşê xo de avûkatî sey hedef ramojnayî. Dozgerî mutalaya xo reyna ard ziwan. Vernî de Fadiş Şenyaşarî dest pê kerd. Şenyaşarî vat ê raştê neheqîye ameyî, xeylêk wexto têna maneno tehlîyeya xo waşte.

Ferît Şenyaşar zî vat: ''Ma sey keyeyî raştê qirkerdişî ameyî. Ma hem bîlasebeb ameyî kiştene û hepsekerdene û hem zî dewa goreyê huqûqî nêameyî rayraberdene. Delîlî yenê nimitene û yeno waştene ke wa dosya bêro qefilnayene. Yew aşme yo ma verê Edlîyeya Riha de wazenê ke doszgerî de pêvînayîş bikerê la o qebul nêkeno. Vera ma sûcê merdimîye ame kerdene. Heme Tirkîya nayî rê şahîd a û seyr kena.  Heme dinya zana ke hukm binê zextî de yo. Qeraro ke vera ma bêro girewtene do wîjdanê welatî bidejno.''

Avûkatanê keyeyê Şenyaşarî ra Bulent Duranî balae ante hêrişê vera muwekîlê ci  Adil Şenyaşarî ser û vat: ''Xapa ci de 17 darbî estê. Nê çekana cîyayan ra vejîyayî la nê dosya de canêgênê. Ganî newe ravrapor bêro girewteen û cipêrsayîş bêro kerdene.  Reyna ma waşt ke wa cayê qewimîyayîşî de cipêrsayîş bêro kerdene û Nesih Şimşek bêro goştarîkerdene la no waştişê ma zî ame redkerdene. Ma reyna veng dane ke waştişê ma bêrê goştarîkerdene û dewa edîl bêro rayraberdene. Têna yew kes tepişteyo û ê bînî serbest gerênê. Nç îdanameyo bêhuqûq muhakemekerdiş nînê qebulkerdene.''

Avûkatanê Şenyaşarî waşt ke wa dosyaya dewa û cipêrsayîş bêrê hîrakerdene. Mehkeme waştişê înan red kerd.

Avûkatanê keyeyê Şenyaşarî ra Hîdayet Enmekî zî bale ante ser ke vernî ra keyeyê Yildizî û avûkatê qewimîyayîşî pabestenê rêxitin a û vat: ''Muwekîlê ka qet yew rêxistine rê girêdaye nîyê. Verî keyeyê Yildizî hêriş kerd. Dîmenan de zî eşkera eseno.  Muwekîlê Celalî erzenê erd û kişenê. Yildizî pê çekan erzenê dikanî ser. Fadil têna wazenêo keyeyê xo bipawo. No xopawitişo meşru yo.  2 serrî û 9 aşmî yo muwekîlê ma têna hucreyêk de maneno, no wîjdanî nîyo. Ma beraate ey wazenê.''

Enver Yildizî zî qiseykerdişê xo de avûkatê keyeyê Şenyaşarî hedef girewtî û înan rê heqeret kerd.

Heyetê mehkeme cezaya 37 serran û p aşman daye Fedil  Şenyaşaro ke qirkerdiş de babîyê ci Haci Esvet birayê ci  Celal û Adîl Şenyaşar ameyî kiştene.

Enver Yildizî rê zî cezaya 18 serran ameye dayene. Derheqê wird tepişteyan de zî qerarê dewam tepiştişî ame dayene.