Daîreyê Ceza yê Dadgerîye yê 16. cezaya 7 serrî û 6 mengî ke hetê mehkemeya cayîye ya ra bi îdîaya “endamê organîzasyonî bîyayîşî” dîyabî parlamenterê HDPyî yê Amedî yo verên û endamê heyetê Îmraliyî Îdrîs Balukenî tesdîq kerde.

Daîreyê Ceza îtîrazo ke avûkatanê Balukenî qerarê Mehkemeya Adlîye ya Dîlokî rê kerdibi girewt xo dest û qerar de wina vat: “Her çende fealîyetê ke çarçiwaya partîya sîyasîye de yê yan zî şîyayîşê pîrozkerdişê Newrozî û serdanê cayê şînî nêeşkê sey fealîyetê organîzasyonê terorî yê bisîlehî bêrê ercnayene zî çalakîyê şidetî yan zî fealîyetê ke bi vengdayîşê îdarekaranê organîzasyonê terorî mumkun nêyê ke sey fealîyetê sîyasîyî bêrê qebûlkerdene.”

Qerar de vajîya ke seba bitewirî û zafîya çalakîyanê Balukenî ê fealîyetan sey “endamê organîzasyonî bîyayîş” ercnayîş qerarêko bêîsabet nêyo û vajîya “nê sebeban ra muracatê versûcî seba ke bica nêame dîyayene, qerar dîya ke dewaya temyîzî esas ra bêro redkerdene, hukm bi yewîya reyan ame tesdîqkerdene.”

Mehkemeya Cezaya Girane ya Amedî ya 8ine 4ê Çileye de Balukenî rê sûcê “endamê organîzasyonî bîyayîşî” ra 7 serrî û 6 mengî, sûcê “propagandaya organîzasyonî” ra 4 serrî û 7 mengî û sûcê “muxalefetê qanûnê kombîyayîş, numayîş û rayraşîyayîşî” ra zî 4 serrî û 7 mengî ceza dabî.