Rojnamegerê ke netîceyê paştîdayîşê Ozgur Gundemî de ceza girewtîbî, cezaya înan ameye qebulkerdene.

Rojnameyê Ozgur Gundemî ke ameyo qefilnayene, seba paştîdayîşê ci kampanyaya ‘Îdarekarîya Nobetî ya Pêroyî ya Weşanî‘ ameyebî destpêkerdene.

Rojnamegerê sey Ayşe Duzkane, Huseyîn Aykol, Mehmet Alî Çelebî, Huseyîn Bektaş û Ragip Duranî yê ke tewrê ci bîyî, ameyî cezakerdene.

Dewa de qeraro peyên ewro ame girewtene û ceza ameye qebulkerdene. Netîceyê qerarê Dadgeha Cezaya Giranî ya 13. ya  Stenbolî de Huseyîn Aykolî rê bi îddîaya ‘propagandaya rêxistinî‘ 3 serrî û 9 aşmî, Mehmet Alî Çelebî, Huseyîn Bektaş Ayşe Duzkane û Ragîp Duranî rê  zî cezayê 6 aşman yê cîya cîyayî ameyî dayene.

Muracatê îtîrazî yê avûkatan ke Dadgeha Edlîye ya Herêma Stanbolî rê amebi kerdene, netîceyê ci bewlî bi. Goreyê naye qerarê ceza raşt o û bêhuqûqîye çîn a.