Muzîsyenê kuçeyan o kurd Cîhan Aymaz 3yê gulana 2023yî de Îskeleya Kadikoyî de seba ke nêwaşt deyîra 'Olurum Turkiyem' vajo hetê nîjadperestê tirkî Mehmet Caymazî ra amebi qetilkerdene. Rixmê îfadeyanê şahîdan zî zabitname de ferzkerdişê deyîra 'Olurum Turkiyem' canêgirewt.

Anqara de zî 2022 de muzîsyen Onur Şener heman sebebî ra amebi qetilkerdene. 

Avûkatê keyeyê Aymazî Muslim Kocaogluyî derheqê dewa de ANFyî rê qisey kerd. 

Avûkat Kocaogluyî da zanayene ke hem şahidan hem zî kiştoxî îfade de vato ke seba ke Aymazî nêwaşt deyîra 'Olurum Turkiyem'î vajo qetil bîyo la zabitname de canêdîyayo ney. 

Kocaogluyî bale ante ser ke serebûtanê winayênan de tim selahîyetdar û hêzê dewlete cînayetan sey 'edlî' mojnenê û nêverdenê ke nê cînayetî sey cînayetê nîjadperestî' pênase bibê.

Kocaogluyî vat: ''Polîsan qestî ra îfadeyê şahîdan û kiştoxî nênuşt. Kiştoxî bi israrî deyîra 'Olurum Turkiyem'î waşta û dima zî Cîhan kardî kerda. Derheqê kiştox Mehmet Caymazî de 14 dosyayê sûcî est bîyê la newe vejîya verê mehkeme. Kiştoxî vat ke o cînayetî ra poşman nîyo. Dima kiştoxî vat ke 5 kesan hêrişê ci kerdo û ey zî seba xopawitişî Cîhan kardî kerdo. Cîhan qelbê xo ra kardî bîyo û merdo. Kiştoxî seba ke nêro lînçkerdene cînayetî ra dima xo eşto dengizî.''

Kocaogluyî pare kerd ke keyeyê Aymazî hema zî şokê serebûtî mîyanî de yo û vat: ''Cîhanî kuçeyan de hunermendîye kerdêne. Zerarê ey çewî ra çin bi. Reya verêne nîya ke muzîsyenê kurdî seba ke deyîra 'Olurum Turkiyem'î nêvata kişîyayê. Ganî vera nê kerdişan têkoşîno pirhetî bêro kerdene.''