Cinîyê HDPyîjî: Zanîngehê cinîyan polîtîkaya cîyakere anê ca

Cinîyan ê ciwanan ê HDPyî ard zıwan ke pê projeyê zanîngehê cinîyan yeno waştene ke cinîyî komelî ra bêrê pakerdene û venga pêro cinîyan da ke vera polîtîkayanê cîyakeran tewrê têkoşînî bibê.

Koordînasyonê Cinîyan ê Ciwanan ê HDPyî derheqê 'zanîngehê cinîyan' de bînaya partîye ya Îstanbulî de kombîyayîşêkê çapemenîye kerd. Wekîle Dersime Dag reyde xeylêk cinîyî tewrê kombîyayîşî bîyî.

Dersime Dag kombîyayîş de qisey kerd û pare kerd ke îqtîdar 20 serrî yo xîret keno ke cinîya mehqûle biaferno. Dersime vat: ''Mumkîn nîyo ke cinîyî projeyê zanîngehê cinîyan qebul bikerê. Îqtîdar seba ke cinîya mehqûle biaferno perwerde xebitneno. Ma vera zanîngehê cinîyan seba zanîngehanê têdûşt, azadan têkoşîn bikerê. Ganî pêro cinîyî nê projeyî red bikerê.''
Endama Koordînasyonî Esengule Kiliç zî vat: ''AKP modelê Japonya seba nê projeyî sey mîsal mojneno. La Japonya hetê têdûştîya cînsan ra astanê nizman de ya. 2002 ra nata polîtîkayê AKPyî seke polîtîkayê dişmenîya vera cinîyan ê. Zanîngehê cinîyan polîtîkaya cîyakere anê ca. Pê nê projeyî zî yeno waştene ke cinîyî komelî ra bêrê pakerdene, cuya perwerdeyî ra bêrê visnayene dûrî.''

Kiliçe venga pêro cinîyan da ke vera polîtîkayanê cîyakeran tewrê têkoşînî bibê.