Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyabî, lajê xo Ferît Şenyaşarî reyde  528 rojî yo verê Edlîyeya Riha de nobeta edaletî gêna. Komeleya Paştdayîşî ya Keyeyê Cinîyan ê Jîyane beşdara nobeta Keyeyê Şenyaşarî bîye.

Emîne Şenyaşar cinîyan rê qala prosesê qirkerdişî û têkoşînê înan ê edaletî kerde.

Endama Komele Serpîle Geyîk derheqê waştişê edaletî yê Şenyaşaran de qisey kerd û vat: ''Ma waşt paştî bidê nobeta Şenyaşaran. Seba ke ma bibê vengê keyeyî ameyê. Dejê dayîke Emîne dejê ma yo. Emîne Şenyaşar cayêkê feodalî yê sey Riha de verê edlîye de nobete gêna. Ma sey cinîyan tim hetê 'dadîya edaletî' de yê.''