Cipersayîşê Serdozgerîya Komare ya Amedî yê derheqê Recep Hantaşî, ke 14'ê Nîsane Amed de, Parkê Sumerparkî de hetê polîsanê Tirkî ra amebi kiştene, ame bedilnayene.

Avûkatê keyeyê Hantaşî Mehmet Onerî îtîraz kerd ke cipersayîşo ke derheqê serebutî de 2 polîsan ra 1 amebi girewtene, arêdayîşê zanayîşan û belgeyan hetê tîmanê Mudirîya Şûbeya Asayîşê ya Mudirîya Asayîşî ya Bajarê Amedî ra bêrê kerdene.

Avûkat Oner, seba polîsê ke tewrê bîyayîşî bîye girêdayîyê yewîyanê asayîşî yê û bi têkilîya xo eşkenê delîlan vîndî bikerê, waşt ke wezîfeyê arêdayîşê belge û zanayîşan hetê tîmanê cendirmeyan ra bêro kerdene.

Serdozgerîye zî wezîfeyê arêdayîşê zanayîş û belgeyan ê cipersayîşî da tîmanê Fermandarîya Cendirmeyan.

Bi çarçewaya nê qerarî, kincê serê Hantaşî, çekê polîsan ê ke wextê serebutî de ameyê xebitnayene seba ke mesafeyê panayîşî dîyar bikerê şawitî bi Bûroyê Krîmînalî yê Fermandarîya Cendirmeyan ê Wanî.

Raporo verên ê otopsîyî yê Hantaşî, seba otopsîyî hîrayî da Fakûleteya Tipî ya Unîversîteya Çukurova.

Dîmenê kamera yê wextê serebutî seba ke nisbetê ci zelaltir bibê şawitî  Sazgehê Tipê Edlî yê Stembolî (ATK).