Çarçewa tehqîqatê vera endamanê Meclîsê Ciwanan ê HDPyî de 8ê teşrîna peyêne de 36 kesî ameyî destbendkerdene. 36 kesê ke vizêr amebî berdene bi mehkeme qase 4 rojan wextê destbendkerdişê înan ame dergkerdene.

Ciwananê destbendkerdeyîyan ra Matîn Yilmazî seba ke cigêrayîşo zitkerde red kerd odayêka bêkamera de îşkence bi ey ame kerdene.  Avûkatan îfade kerd ke wextê sewqî de seba ke kelemçeyê ciwanan bi hawayêkê pêtî ameyî giredayene destê înan mor bîyî. Ciwanan waşt ke seba naye raporê derbî bigêrê labelê doktoran ciwanî oda ra vetî. Avûkatan vat ke ciwanî nêameyî weşkerdene û seba rêçanê derban raporî nêameyî dayene. Avûkatan pare kerd ke her çiqas înan verê ci de vindertî zî muwekîlê înan bi kelemçeyanê çepan Adlîye ra ameyî berdene. Ame vatene ke kesanê ke xo sey 'selahîyetdaranê dewlete' da şinasnayene seba xoşebere venga ciwanan da û înan bi vatişê 'tepişitişî' gef ro ciwanan wend.