Lajê Leyla Guvene Mustafa Temîzkanî taleb kerd ke derheqê grevanê vêşanîye de, Sekreterê Rayberdişî yê CPT‘yî Rêgît Brîllatî de pêvînayîş bikero.

Temîzkanî ard vîrî ke maya ey Leyla Guvene û xoverdayoxê bînî, hetê weşîye ra asta krîtîke de yê û waşt ke no derheq de, bi nameyê keyeyanê xoverdayoxan pêvînayîşan bikero. Brîllatî bi reya e-maîlî cewab dayo Temîzkanî û vato ma îdarekaranê Tirkîya reyde dîyalog de yê. Brîllatî e-maîlê xo de wina nuşto: “Çi heyf ke ez Strasbourg de nîya û seba pêvînayîşî amade nîya. CPT no derheq de îdarekaranê Tirkîya reyde dîyalog de yo û no çarçewa de naye ra ver zî muracatî ameyî kerdene. Ma do qisawetanê şima ser vindê.“ La e-maîl de senî dîyalogî yenê dewamkerdene nênuşîyê û reyna yeno meraqkerdene ke CPT’yî Îmralî zîyaret kerdo yan nê, yan zî ê do keyî bikerê.