Geverê Çolemêrgî de serê sibayî Mustafa Bor sereştişê keyeyan de raştê hêrişê wehşîyî yê polîsanê tirkan ame. Bor semedê kontorolê weşîye ame berdene nêweşxena. Doktoran vat “dejê sereyî” û bîyî hemkarê sûcê polîsan.
Qezaya Geverî ya Colemêrgî de sereştişê keyeyan de Demhat Kûrt, Diyar Şedal, Rahmî Terzîoglû, Îsa Terzîoglû, Aras Yaşar, Diyar Şedal, Ûgûr Şedal, Mûstafa Bor ameyî destbendkerdene. Wextê sereştişan de ber û pencereyî ameyî şiknayane, keyeyî ameyî serûbinkerdene û ciwanî raştê îşkenceyî ameyî.
Polîsan bi dimçikê tifîngî da ciwanan ro, ciwanî xeylêk cayanê xo ra birîndar bîyî. Ciwanî verî Neweşxaneyê Dewlete yê Geverî de ameyî kontrolkerdene û dima ra ameyî berdene merkezê polîsan. Fotografê Mustafa Borî ke raştê hêrişî ameyo, vejîya werte. Fotograf de yeno vînayene ke sereyê Borî şikiyayo û bedenê bîyo mor û gonî tira ameya. Rixmo ke eşkera rêçê îşkenceyî yenê vînayene raporê nêweşxaneyî de têna ame vatene ke “dejê sereyî” est o.
