Komeleya Hetkarî û Paştdayîşî ya Alîmanê Dînî  (DÎAYDER) ke Îstanbul de falîyet rayra bena bi qerarê  mehkeme seba ke waîzo kurdkî dayo berê ci ame morkerdene. Endamanê DÎAYDERî rêxistina HDPyî ya Bahçelîevlerî de vera qerarî eşkerayîye daye û nêrazîbîyayîş mojna.

Eşkerayîye de endamê komele Yusuf Înalî qisey kerd. Înalî vat: ''Ewro komeleya ma biqefilîyo zî ma do siba yewna komele abikerê. Xora komeleya ma ya verêne zî amebî qefilnayene. Na komeleya dîyên a. Komeleya ma se rey zî biqefilnê ma do yewna komele abikerê. Qerarê qefilnayîşî huqûqî nîyo. No qeraro sîyasî yo ke xizmetê îslamê sîyasîyî  keno. Xora dîno ke bikewo binê serbanê dewlete dîn nîyo. Ma têna qala wayûbiratîya Quranî kenê. Eke welat de huqûq est o, şima qey komeleya ma qefilna? No semedê şima lekeyêko sîya yo. Îsraîl  hema heta ewro camî mor nêkerdo. Çîyo ke şime kene qale çina ke ma pê bîyarê ziwan.''

Serekê Cemxaneyê Gezîyî Hirdir Karadaşî zî ard ziwan ke rewşe çend şino xirabêr bena û vat semedê haştîye, heskerdiş û waybiratîye ganî her kes hetê xo ra  têkoşîn bikero.

Bi nameyê cemaatê camî Suleman Yildizî bale ante ser ke seba ke camîya înan ameye qefilnayene o serê texteyî de nimaj keno û vat heta akerdişê camî ê do wina nimaj bikerê.

Sereka HDPyî ya Îstabulî Ilknure Birol zî vist vîrî ke îqtîdar teberê bawerî û nasnameyê xo de ê bînan rê dişmenîye keno û vat êyê ke ewro wina neheqîye kenê do demê kilmî de verê huqûqî de hesab bidê.