Komeleya Paştdayîş û Hetkarîye yê Alîmanê Dînî (DİAYDER) derheqê îdîanameyê ke vera endamanê înan ame amadekerdene de banê komele de eşkerayîye daye. Avûkatê endamanê komele yê ke muhakemekerdene zî tewrê kombîyayîşî bîyî.

Endamê DÎAYDERî Yusuf Înanî vat: ''Senî ke aqilê xo bipernê, wina hêriş kenê. Tuzukê alîmanê dînî esto ke ma nêvejîyayî teberê ci. Ma çarçewaya komelkî  fermî de têgêrenê. Pê nê kayanê leyminan nêeşekenê verê ma bigêrê. Na dewaya heqî ya.  Hûma neheqîye qebul nêkeno. Ma goreyê wecîbeyanê dînîyan têgêrenê. Goreyê mezheban qisey kenê. Têna panc kadroyê ma estê. Hîrê embazê ma ameyî tepiştene. Eleqeya ma bi sîyasetî çîn a. Kam heq vajo ma kişta ci de yê. Çapemenîya ke wîjdanê xo roto hêrişê ma kena. Ma do wayîrê heqanê xo vejîyê. Ma do axretî rê meverdê.  Terorîstê raştî êyê ke hêrişê ma kenê. Nê DAÎŞî ra wetêr ê.''

Avûkate Komele Fritat Epozdemîrî zî ard ziwan ke ê hêrişanê vera DÎAYDERî rê eceb mendî û vat: ''Ma do vera nê hêrişan prosesê huqûsî bidê destpêkerdene. Yeno îdîakerdene falîyetê rêxistine ameyî kerdene. DÎAYDER hetê endamanê xo ra yeno fînansekerdene ke no zî çîyêko zaf normal o. Vera komele qet delîlêk çîn o. No operasyonêko sîyasyî yo. Îdîaneme de eşkera yeno vînayene ke vera kurdkî dişmenîye yena kerdene.''