Endamanê Kongreya Îslamî ya Demokratîke (DÎK) seba wedaritişê tecrîdê serê Rayberê Şarê Kurdî Abdullah Ocalan û balantişê serê grevê vêşanîye yê bêdem û bêagêrayîşî banê DÎAYDER’î yê Şîrînevlerî de eşkerayîya çapemenîye daye.

Şexsê Ocalanî de Kurdî û Rojakewtena Mîyanêne tecrîd de ya

Endamê DÎK’î Ekrem Baranî ard ziwan ke bi hezaran kesî grevê vêşanîye de yê û vat, “Tecrîd sûcêkê merdimîye yo. Tecrîdê serê Ocalanî yeno manaya tecrîdê serê şarê Rojakewtena Mîyanêne. Ganî tecrîd bêro wedartene. Ganî ma goş bidê çalakwananê grevê vêşanîye ser. Ganî cuya merdiman bêra pawitene.”

Quranî de no çin o

Endamê DÎK’î Mehmet Şîmşek zî Quranî ra nimûneyêk da û vat, “ Quranî de heqê dewlemendan, feqîran, padîşahan eynî yê. Heqê tu kesî yê bîn ra kêm yan zî zêde nîyê. Seba grevê vêşanîye û wedartişê tecrîdî ma verê xo bi nê cayî. Ganî no zulm serê merdiman ra bêro wedartene.”

Endamê DÎK’î Mehmet Emîn Aslanî zî vat, “Cayo ke huqûq qedîyayo û merdim muxatap nêno girewtene de çalakwanê grevê vêşanîye nê refleksî mojnenê. Ganî ma selahîyetdaran ra bipersê ke kam bîyo sebebe ke nê merdimî kewtê grevê vêşanîye, gelo çira şima goreyê normanê huqûqî ney, goreyê normanê xo têgêrênê? Huqûqê rojêk îbadetê hezar  serran ra baştir o. Ê yê ke bêhuqûqîye kenê, îbadetê xo yê serrêk pûç kenê.”