Heme partîyanê Parlamentoyê Danîmarka, pêşnûmeya persî ya derheqê Tirkîya qebûl kerde.

Pêşnûmeya persî ya ke seba cewabdayîşê Wezaretê Teberî ameya amadekerdene, roniştişê 23'ê Nîsane de ameye munaqeşekerdene. 25'ê Nîsane zî pêşnûmeya persî seba raydayîşî ameye pêşkêşkerdene û bi hemvengî ameye qebûlkerdene.

Pêşnûmeya persî ya ke tede zextê vera girewteyanê sîyasî û muxalefetî yê Tirkîya bi ziwamêkê wişkî yenê rexnekerdene, bi morê Partîya Koalîsyonê Sure û Keske, parlamentera Enhedslistenije Soren Sondergaard, Demokratanê Socîalî ra Lars Aslan Rasmussen, Partîya Alternatîvetî ra Rasmuş Nordqvîst, Partîya Şaran a Socîalîstî ra Holger K. Nîelsen ameye pêşkêşkerdene. Partîyanê parlamentoyî yê muxalefet û îqtîdarî da zanayene ke hetê heqanê merdiman ra ê Tirkîya ra bifikar ê.

Pêşnûme de dadgerîya Tirk a hetkara îqtîdarî bişîdet ame rexnekerdene û vengdayîş bi parlamento û hukmatê Danîmarka ame kerdene ke seba Tirkîya de sîyasetmedar, rojnameger û muxalîfî bêrê veradayene Yewîtîya Ewropa (YE) bikewa mîyanê têgêrayîşî.

Eke grevê vêşanîye rê çare nêro dîyayene…

Partîya Koalîsyonê Sure û Keske û parlamentera Enhedslîstenî Soren Sondergaardî, bale ante serê xoverdayîşê grevê vêşanîye û vat, “Eke grevê vêşanîye rê çare nêro dîyayene, goş nêdayê waştişanê Leyla Guvene ser, Guvene do biba wekîla verêne ya ke grevê vêşanîye de cuya xo vîndî kerda.”

Ganî ma zext bi Tirkîya bikerê    

Serekê Partîya Tifaqa Lîberale û Wezîrê Karanê Teberî Anders Samulensenî zî ard ziwan ke ganî YE derheqê binpankerdişê heqanê merdiman de zextan bi Tirkîya bikera.

Pêşnûme de xeylî rexne û tespîtê giran ê serê Tirkîya ca girewt û ame vatene ke ganî seba vernîgirewtişê dîktatorîya Tirkîya zext ci rê bêrê kerdene, nêbo Tirkîya bi lezabez ver bi şerêkî zereyî şina.