Tepişteyo sîyasî Kadrî Ekîcî (25) 21ê temmuze de Zîndanê Qefilnayeyî yê Amedî de hucreyê yewkesî de merde amebi vînayene. Îdarê zîndanî îdîa kerd ke ey xo kişto. Keyeyê Ekîcîyî vano lajê înan ame înfazkerdene.

 Merdimanê Kadrî Ekîcîyî  yê  ke Şînxaneyê Hewêdanijan de tehzîye naya ro, Ajansê Mezopotamya rê qisey. Dayîke Netîce Ekîcî ard ziwan ke aye tewr peynî pêvînayîşê Roşanê Qurbanî de lajê xo dîyo û vat: ''Lajê mi hetê gardîyanan ra amebi derbkerdene û birnika ci şikîyaybî. Lajê mi nizdê yew serrî yo hucre de ameyêne tepiştene. Dermanê lajê mi ci nêdayêne û o tedawî nêkerdêne. Wextê definkerdişî de zî ma raştê hêriş û zextê dewlete ameye. Lajê mi xo nêkişto, ez çirey çîyo winayênî ra bawer nêkena. Rojêke verê mergê ci telefon kerd ma ra pere waşt. Eke waştêne xo bikişo qey pere wazeno. Mi înan rê vat şima lajê mi kişto, pê mi wîyayî. Garîdyayan tim lajê mi tehdît kerdêne. Lajê mi xo nêkişt. Dewlete mergê ey ra berpirsîyar a.''

Xalê Ekîcîyî Aydin Kayar zî ard ziwan ke ey cenazaya warzayê xo şita û vat: ''Bedenê ey de derbî bibî. Warzayê mi xo nêkişt ame înfazkerdene. Berpirsîyarê mergê ey dewlet a. Ma do na dewa cameverdê.''